रुकुम पश्चिम महोत्सव आज छैटौँ दिन पनि जारी रह्यो । आज चर्चित लोक तथा दोहोरी गायक पशुपति शर्माले प्रस्तुति राख्नुभएको छ । उहाँको प्रस्तुति हेर्न ठुलो सङ्ख्यामा दर्शकहरू पुगेका थिए ।

महोत्सवमा सातौँ दिन भोली बिहीबार पनि जारी रहने छ । महोत्सवमा भोली चर्चित नायक तथा मोडल पल शाह आउने सह आयोजक कला संस्कृति, पर्यटन प्रवर्द्धन मञ्चका अध्यक्ष डिल्ली परियारले जानकारी दिनुभयो । पल दोस्रो पटक रुकुम पश्चिम आउन लाग्नुभएको हो । 

जबरजस्ती करणीको मुद्दामा एक वर्ष जेल बसेका पल सफाइ पाएपछि सार्वजनिक कार्यक्रममा सहभागी हुने क्रममा पहिलो पटक रुकुम पश्चिम पुग्नुभएको थियो । उहाँको यो जेल जीवन पछिको पहिलो सार्वजनिक कार्यक्रम थियो । 

महोत्सव आयोजकले भोली महोत्सव अवलोकनका लागि आउन सबैलाई आग्रह गरेको छ । पल सहित अन्य कलाकारको समेत महोत्सवमा प्रस्तुति रहने अध्यक्ष परियारले बताउनुभयो ।

महोत्सव फागुन २८ गतेसम्म सञ्चालन हुने छ । महोत्सवमा चर्चित नायक तथा मोडल पल शाह सहित चर्चित हास्य कलाकार धुर्मुस–सुन्तली लगायतका कलाकार आउने आयोजकले जनाएको छ । रुकुम उद्योग वाणिज्य सङ्घको आयोजना र कला, संस्कृति, पर्यटन प्रवर्द्धन मञ्च रुकुम पश्चिमको सह आयोजनामा शुक्रवार देखि महोत्सव सुरु भएको हो ।