गत कात्तिक १७ गते जाजरकोट रामीडाँडा केन्द्र विन्दु बनाएर गएको भूकम्पले क्षति पुर्याएको रुकुम पश्चिममा अस्थायी आवास निर्माणको काम अझै जारी छ । भूकम्प गएको पाँच महिनाको अवधिमा भूकम्पपीडितको अस्थायी आवास निर्माणको काम अन्तिम चरणमा पुगेको छ ।
पाँच महिनाको अवधिमा जिल्लाभर २९ हजार सात सय ५४ अस्थायी आवास निर्माण सम्पन्न भएको सहायक प्रमुख जिल्ला अधिकारी प्रवेश बढुवालले जानकारी दिनुभयो । उहाँका अनुसार जिल्लाभर अझै दुई हजार एक सय ९२ अस्थायी आवास निर्माणको चरणमा रहेका छन् । जिल्लामा हालसम्म सबैभन्दा बढी अस्थायी आवास आठबिसकोट नगरपालिकामा नौ हजार ८३ र सबैभन्दा कम मुसिकोट नगरपालिकामा नौ सय ६६ अस्थायी आवास निर्माण भएका छन् ।
त्यस्तै चौरजहारी नगरपालिकामा ६ हजार ६ सय ६८, सानीभेरी गाउँपालिकामा पाँच हजार सात सय २१, त्रिवेणी गाउँपालिकामा चार हजार तीन सय ३३ र बाँफिकोट गाउँपालिकामा लाभग्राही पहिचान भएका सबै दुई हजार नौ सय ९३ अस्थायी आवास निर्माण सम्पन्न भएको सहायक प्रजिअ बढुवालले जानकारी दिनुभयो ।
हालसम्म जिल्ला विपत् व्यवस्थापन कोषबाट ३१ हजार तीन सय लाभग्राहीको लागि स्थानीय विपत् न्यूनीकरण कोषमा २५ हजारका दरले ७८ करोड २५ लाख रकम पठाइएको छ । स्थानीय विपत् कोषबाट भने ३० हजार आठ सय ४१ लाभग्राहीले २५ हजारका दरले ७७ करोड १० लाख २५ हजार रकम प्राप्त गरेका छन् । अब जिल्लामा पहिचान भएका तीन सय ५९ लाभग्राहीले अस्थायी आवास निर्माण गर्न पहिलो किस्ता पाउन बाँकी रहेको जिल्ला प्रशासन कार्यालय रुकुम पश्चिमले जनाएको छ।
