रुकुम पश्चिमको मुसिकोट नगरपालिका वडा नम्बर १ छिङ माथि गाउँमा महिला, पुरुष भलिबल प्रतियोगिता हुने भएको छ । नयाँ वर्ष २०८१ को अवसरमा वैशाख १ देखी ४ गते सम्म खेलकुद प्रतियोगिता हुन लागेको हो । वडामा रहेको सुनौलो सहिद युवा क्लबले खुला शुद्ध वडा स्तरीय भलिबल प्रतियोगिताको आयोजना गरेको छ । पुरुष भलिबल तर्फ प्रथम हुने टिमले नगद ६० हजार रुपैयाँको साथमा कप मेडल र प्रमाण पत्र प्राप्त गर्ने भएको छ ।

यस्तै दोस्रो भएको टिमले ४० हजार साथमा मेडल र प्रमाण पत्र पाउँदा तेस्रो भएको टिमले २० तथा सान्त्वना भएको टिमले दश हजार रुपैयाँको साथमा मेडल र प्रमाण पत्र प्राप्त गर्ने क्लबका महा सचिव भरत रावतले जानकारी दिनुभयो । यस्तै महिला भलिबल तर्फ प्रथम टिमले नगद १५ हजार रुपैयाँको साथमा कप मेडल र प्रमाण पत्र प्राप्त गर्ने भएको छ भने दोस्रो टिमले नगद दश हजार र तेस्रो भएको टिमले नगद सात हजार रुपैयाँको साथमा मेडल र प्रमाण पत्र पाउने क्लबका महासचिव रावतले जानकारी दिनुभयो ।

यस्तै महिला पुरुष रस्साकस्सी प्रतियोगितामा पनि हुने भएको छ । रस्साकस्सी प्रतियोगितामा महिला र पुरुषको पुरस्कार राशि समान रहेको छ । विजेता भएको समूहलाई समान दुई हजार पाँच सय रुपैयाँ वितरण गरिदिने आयोजकले जानकारी दिएको छ । यस क्षेत्रमा हरेका वर्ष खेलकुद प्रतियोगिता साथमा मेला लाग्ने गरेको छ ।