रुकुम पश्चिमको त्रिवेणी गाउँपालिकाले सञ्चालन गरेको गाउँपालिका स्तरीय आधारभूत तह परीक्षामा ५६ दशमलव ०७ प्रतिशत अर्थात् ३ सय जना विद्यार्थी उत्तीर्ण भएका छन् । ५ सय ३५ जना विद्यार्थी सहभागी भएको पालिका स्तरीय कक्षा ८ को परीक्षामा ५६ दशमलव ०७ प्रतिशत अर्थात् ३ सय जना विद्यार्थी मात्र उत्तीर्ण भएका हुन् । जसमा २४ दशमलव ६७ प्रतिशत अर्थात् १ सय ३२ विद्यार्थी मौका परीक्षा दिने अवसर पाएका छन् । परीक्षामा सहभागी मध्ये १९ दशमलव २५ प्रतिशत अर्थात् १ सय ३ जना विद्यार्थी भने नन ग्रेड अर्थात् अनुत्तीर्ण भएको त्रिवेणी गाउँपालिका शिक्षा, युवा तथा खेलकुद शाखा प्रमुख सुरेश पुनले जानकारी दिनुभयो ।

उहाँका अनुसार परीक्षामा ३७ जना विद्यार्थी अनुपस्थित थिए । पालिकामा रहेका आधारभूत विद्यालय तथा माध्यमिक विद्यालयबाट गरी जम्मा २० वटा विद्यालयबाट परीक्षार्थी सहभागी भएका थिए । शिक्षा खेलकुद तथा युवा शाखाले सार्वजनिक गरेको परीक्षाको नतिजा हेर्दा विद्यालयको अवस्था कमजोर देखिएको छ । परीक्षामा सहभागी भएका विद्यार्थीको अनुपात हेर्दा सबैभन्दा कमजोर साधारण माध्यमिक विद्यालय मुरुडाँडामा देखिएको छ । जसमा २० विद्यार्थीमा ४ जना मात्रै विद्यार्थी उत्तीर्ण भएका छन् । 

त्यस्तै अन्धनाशक माध्यमिक विद्यालय खुम्चेरीबाट ३१ विद्यार्थीमा ७ जना, भिमकल्याण आधारभूत विद्यालय बाँठाकोटबाट १७ विद्यार्थीमा ४ जना, जनशक्ति मावि विताडाँडाबाट २८ विद्यार्थीमा ७ जना, बालकल्याण आवि लाछिकोटबाट २२ विद्यार्थीमा ७ जना, युवा जनजागरण आवि खारा कुरलबाट १२ विद्यार्थीमा ५ जना,  सुभप्रभात आवि पेउघाडाँडामा १५ विद्यार्थीमा ६ जना विद्यार्थी उत्तीर्ण भएको शिक्षा, युवा तथा खेलकुद शाखा प्रमुख पुनले जानकारी दिनुभयो । 

२० वटा विद्यालय मध्ये १२ वटा विद्यालय नतिजा ५० प्रतिशत भन्दा बढी आएको छ । पालिका स्तरीय आधारभूत तह परीक्षामा सबैभन्दा राम्रो नतिजा विद्या विकास माध्यमिक विद्यालय जिवाङले ल्याएको छ । उक्त विद्यालयले  ९१ दशमलव ६६ प्रतिशत ल्याएर पालिकाकै पहिलो विद्यालय बनेको छ । यहाँबाट २४ जना विद्यार्थी परीक्षामा सहभागी भएकामा २२ जना विद्यार्थी उत्तीर्ण भएका छन् । त्यस्तै ७३ दशमलव ०७ प्रतिशत अर्थात् २६ विद्यार्थीमा १९ विद्यार्थी उत्तीर्ण हुँदै बालकल्याण मावि टोट्के दोस्रो, ७३ प्रतिशत अर्थात् १६ विद्यार्थीमा १२ विद्यार्थी उत्तीर्ण हुँदै जनस्थापना आवि लाइत राम्रो नतिजा प्राप्त गर्नेमा तेस्रो विद्यालय बनेको छ ।

यस वर्ष ८ वटा विद्यालयको नतिजा भने निकै कमजोर देखिएको शिक्षा, युवा तथा खेलकुद शाखा त्रिवेणीले जनाएको छ । चैत २ गतेदेखि ९ गतेसम्म सञ्चालन भएको परीक्षाको नतिजा  शाखाले शुक्रवार प्रकाशन गरेको थियो । दुई विषयमा नन ग्रेड ल्याएका विद्यार्थीहरूका लागि मौका परीक्षा(पूरक) आगामी वैशाख १४ र १५ गते तोकिएको छ ।