रुकुम पश्चिमको आठबिसकाेट ९ राडीमा आयोजित महोत्सवमा भोलि मङ्गलवार चर्चित गायक राजु परियार आउनुहुने भएको छ । मङ्गलवार राजु सहित विभिन्न कलाकारको प्रस्तुति रहने महोत्सव संयोजक तुल देवकोटाले जानकारी दिनुभयो ।

राजु नेपाली लोक सङ्गीतका धरोहर हुनुहुन्छ । जादुमय स्वरका धनी राजु सबै उमेरका दर्शक माझ चर्चित हुनुहुन्छ । उहाँले गाएका सयौँ गीत चर्चित छन् । राजुकाे प्रस्तुतिकाे पर्खाइमा रहेका रूकुमेलीकाे धाेकाे मंगलबार मेटिने भएकाे छ ।

कला संस्कृति, पर्यटन प्रवर्द्धन मञ्च रुकुम पश्चिमको आयोजनामा बिहीबार ‘आठबिसकोट पर्यटन, व्यापार तथा सांस्कृतिक महोत्सव’ सुरु भएको हो । 

महोत्सवमा चर्चित हास्य कलाकार धुर्मुस सुन्तली, पशुपति शर्मा, एलिना चौहान, सिम्रन परियार, टीका सानु लगायतका राष्ट्रिय तथा स्थानीय कलाकारहरूको पनि प्रस्तुति रहने आयोजकले जनाएको छ ।

महोत्सवमा ५० बढी स्टल रहेका छन् । महोत्सवको सह आयोजकमा समृद्ध कर्णालीका लागि हाम्रो चाहना रुकुम पश्चिम रहेको छ । त्यस्तै व्यवस्थापकमा राष्ट्रिय लोक तथा दोहोरी गीत प्रतिष्ठान रुकुम पश्चिम र संरक्षकमा आठबिसकोट नगरपालिका रहेका छन् ।