रुकुम पूर्वको सिस्ने गाउँपालिका वडा नम्बर ८ झिमखोलामा सञ्चालन भएको दोस्रो लक्ष्मी गोल्ड कपको उपाधि बाँफिकोट २ ले जितेको छ । वडामा रहेको सहिद महेन्द्र लक्षु स्मृति क्लब आफ्नो वार्षिकोत्सव अवसरमा सञ्चालन गरेको गोल्ड कपको उपाधि बाँफिकोट २ ले आफ्नो पक्षमा पारेको हो ।

दोस्रो लक्ष्मी गोल्ड कप अन्तर्गत खुला शुद्ध वडा स्तरीय महिला पुरुष भलिबल प्रतियोगिता सञ्चालन भएका थिए । चैत्र २६ गतेबाट सुरु भएको दोस्रो लक्ष्मी गोल्ड कप अन्तर्गतका प्रतियोगिता आइतबार सम्पन्न भएका हुन । फाइनलमा पुरुष तर्फ बाँफिकोट गाउँपालिका वडा नम्बर ४ लाई र महिला तर्फ आयोजकलाई पराजित गर्दै बाँफिकोट २ ले दोस्रो लक्ष्मी गोल्ड कप उपाधि उचालेको हो ।

पुरुषले नगद ५१ हजार रुपैयाँको साथमा कप मेडल र प्रमाण पत्र प्राप्त गरेको छ, भने महिलाले नगद २० हजार रुपैयाँको साथमा कप, मेडल, र प्रमाण पत्र हात पारेका छन् । रुकुम पूर्व र पश्चिमका १९ टिमले प्रतिस्पर्धा गरेको पुरुष भलिबल तर्फ दोस्रो भएको बाँफिकोट गाउँपालिका वडा नम्बर ४ ले नगद ३१ हजार रुपैयाँ तथा तेस्रो भएको आयोजकले नगद २१ हजार रुपैयाँको साथमा मेडल, र प्रमाण पत्र पाएका छन् ।

आठ टिमले प्रतिस्पर्धा गरेको महिला भलिबल प्रतियोगिता तर्फ आयोजक दोस्रो भएको छ । उसले नगद १५ हजार रुपैयाँको साथमा मेडल र प्रमाण पत्र पाउँदा तेस्रो भएको बाँफिकोट ४ ले नगद दश हजार रुपैयाँको साथमा मेडल र प्रमाण पत्र प्राप्त गरेको क्लबका महा सचिव दुर्गा पुन मगरले जानकारी दिनुभयो ।