लामो समय देखि वर्षा नहुँदा रुकुम पूर्वका विभिन्न ठाउँमा रोपिएको आलु र मकै सुकेको छ । आकाशे पानीको भरमा रोपिएको बर्खे बाली सुकेको हो । वर्षा नहुँदा किसान चिन्तित भएका छन् । बाली जोगाउनको लागि अहिले जिल्लाका किसान पानी माग्दै हिँडेका छन् । उनीहरूले विभिन्न पानी मुहानमा पुगेर पानी माग्ने गरेका हुन । शनिवार भूमे गाउँपालिका वडा नम्बर २ काँक्री गाउँका स्थानीयले पानी मागेका छन् ।
गाउँ नजिकैको सैपातुङ बगरबाट पानी माग्न सुरु गरिएको हो । लामो समय देखि पानी नपरे पछि गाउँलेहरू पानी माग्न जुटेका छन् । कुनै वर्ष बगरबाट पानी माग्दै लेकको मुहानसम्म जाने चलन छ भने कुनै वर्ष लेकको मुहानबाट बगर तिर झर्ने चलन छ । यो वर्ष भने वडाको सैपातुङ बगर देखि सुकाखोला गलच्वल मूल हुँदै रिसेको मूलसम्म पानी मागिएको हो ।
लामो समय देखि वर्षा नभएको समयमा यसरी पूजापाठ गरेर पानी माग्न चलने परम्परा देखि चल्दै आएको चलन छ । भूमे १ काँक्रीकि सृजना बुढाले पूजापाठ गरे पनि कुनै वर्ष पानी पर्ने र कुनै वर्ष पानी नपर्ने गरेको बताउनुभयो । जैसीले नाम जुराएका दुई जना किशोर किशोरीलाई नक्कली बाेल्न नसक्ने बनाउने गरिन्छ । उनीहरूले नै अनेक क्रियाकलाप गरेर पानी गर्ने माग्ने गर्दछन् ।
पानीका मुहानमा गएर सुँगुर तथा कुखुरा काट्ने नाचगान गरी अक्षता तथा धजा चडाउने गरिन्छ । यसो गरियो भने देउता रिसाएर पानी दिने धार्मिक विश्वास रहेको छ । पानी माग्नको लागि शनिवार, मङ्गलवार र सङ्क्रान्ति तथा औँसी पुर्णीमाको जोग बनाएर जैसीले दिन जुराइदिन्छन् । जैसीले जुराएको दिनमा पानी माग्ने गरिन्छ । पानी माग्नको लागि गाउँका मानिसहरू मूल खोज्दै बगर देखि लेकको मुहानसम्म पुग्ने गरेको भूमे ३ क्याङ्सीकी सङाली सुनारले जानकारी दिनुभयो ।
पानीको मुहान पूजापाठ तथा सुँगुर काटेर जल देवतालाई पानी माग्ने गरिन्छ । पानी माग्ने चलन ठाउँ अनुसार फरक फरक रहेको छ । कुनै गाउँमा सुँगुर काटेर मूलमा फाल्ने चलन हुन्छ भने कुनै ठाउँमा कुखुरा काटेर फाल्ने चलन छ । नक्कली रूपमा बनाइएका बाेल्न नसक्नेले पानीको मूलमा गरेको अनाैठाे क्रियाकलापबाट देवता रिसाएर पानी पर्ने गरेको पुथा गाउँपालिका वडा नम्बर १ मैकोटका दर्शन विकले बताउनुभयो । जैसीले भने अनुसार वैशाख २५ गते सम्म पर्ने भन्दै काँक्रीका स्थानीय खुसी छन् । यस अघि पनि भूमे १ को लुकुम गाउँका स्थानीयले पानी मागेका थिए ।
फाेटाेहरू तिलक राेका मगरकाे फेसबुकबाट साभार ।
