रुकुम पश्चिमको त्रिवेणी गाउँपालिकामा गाउँ सभाको नमुना अभ्यास गरिएको छ । गाउँपालिकाको आयोजना र राष्ट्रिय युवा परिषद्को सहयोगमा जेठ २ गतेदेखि आजसम्म चार दिने नमुना युवा गाउँ सभा अभ्यास कार्यक्रम सञ्चालन भएको हो । 

कार्यक्रममा गाउँपालिकाका १० वटै वडाका १६ देखि २४ वर्ष उमेर समूहका ३६ जना युवाहरूको सहभागिता रहेको थियो । सहभागीहरूलाई गाउँ सभा, रिडिङ पेपर, नीति तथा कार्यक्रम, बजेट वक्तव्य, लोकतन्त्र, युवा नीति, युवा क्लब, युवा सञ्जाल, स्थानीय तहमा योजना तर्जुमाका चरणहरूका बारेमा सिकाइएको थियो । 

त्यस्तै गाउँ सभा पदाधिकारीहरूको भूमिका, विधेयकहरू, निर्वाचन प्रक्रिया, सूचनाको हक, गाउँ सभा सञ्चालन कार्यविधि, युवा जीवनमा मार्गदर्शनको महत्त्व, युवा सम्बन्धी काम गर्ने विभिन्न निकायहरू लगायतका विषयमा प्रशिक्षण दिइएको युवा समन्वय समिति रुकुम पश्चिमका अध्यक्ष भिमराज ओलीले जानकारी दिनुभयो । 

उहाँका अनुसार उक्त कार्यक्रममा नमुना युवा गाउँ सभाको लागि पदाधिकारीहरू सर्वसम्मत चयन भएका थिए । अध्यक्षमा दीपेन्द्र ओली, उपाध्यक्षमा करिष्मा खड्का र प्रमुख प्रशासकीय अधिकृत (सचिव)को भूमिकामा टेकम डाँगी रहनुभएको उहाँले बताउनुभयो ।

साथै कार्यक्रमबाट ११ सदस्यीय त्रिवेणी गाउँपालिका स्तरीय युवा क्लब सञ्जाल गठन भएको छ । दीपेन्द्र ओलीको नेतृत्वमा ११ सदस्यीय सञ्जाल निर्माण गरिएको हो । यसैवर्ष कर्णाली प्रदेशको राजधानी सुर्खेतमा हुने ‘नमुना युवा प्रदेश सभा अभ्यास’ कार्यक्रमका लागि २ जना दीपेन्द्र ओली र करिष्मा खड्कालाई छनोट गरिएको ओलीको भनाई छ ।

कार्यक्रमका सहभागीहरूलाई राष्ट्रिय युवा परिषद्मा कार्यरत उप सचिव कर्णबहादुर कँवर र राष्ट्रिय युवा परिषद्का प्रशिक्षक राजेन्द्र अधिकारीले प्रशिक्षण दिनुभएको थियो । उपसचिव कँवर यो कार्यक्रमले युवाहरूको दक्षता, क्षमता, नेतृत्व विकास र सशक्तीकरणमा महत्त्वपूर्ण भूमिका खेल्दै आएको बताउनुभयो । 

युवाहरूले स्थानीय शासन प्रक्रियाको बारेमा जानकारी राख्दै स्थानीय सरकारलाई निरन्तर खबरदारी सहितको रचनात्मक सहयोग गर्ने भएकाले यो कार्यक्रमको महत्त्व समेत धेरै रहेको उहाँको भनाई थियो । 

समापन समारोहमा भगवतीमाई गाउँ युवा परिषद्का कार्यकारी उपाध्यक्ष एवं राष्ट्रिय युवा परिषद्का प्रशिक्षक राजेन्द्र अधिकारीले स्थानीय युवा परिषद् गठन सम्बन्धी विधेयकको मस्यौदा त्रिवेणी गाउँपालिका अध्यक्ष गणेशकुमार केसीलाई हस्तान्तरण गर्नुभएको थियो ।

समापन कार्यक्रममा त्रिवेणी गाउँपालिकाका अध्यक्ष गणेशकुमार केसी, राष्ट्रिय युवा परिषद्का उपसचिव एव प्रशिक्षक कर्णबहादुर कँवर, गाउँपालिकाका सामाजिक विकास समितिका संयोजक रणबहादुर पुन, प्रमुख प्रशासकीय अधिकृत प्रेमबहादुर घर्ती, युवा समन्वय समिति रुकुम पश्चिमका अध्यक्ष भिमराज ओली लगायतले मन्तव्य राख्नुभएको थियो ।

कार्यक्रमको सञ्चालन शिक्षा, युवा तथा खेलकुद शाखा प्रमुख सुरेश पुनले गर्नुभएको थियो ।