१५ वर्ष मुनिको ब्याडमिन्टन प्रतियोगिताका लागि रुकुम पश्चिमबाट ४ जना खेलाडी छनोट भएका छन् । राष्ट्रिय प्रतियोगिताका लागि कर्णाली प्रदेश स्तरीय छनोट खेल्ने ४ जना खेलाडी छनोट गरिएको जिल्ला ब्याडमिन्टन सङ्घका अध्यक्ष अनिल बुढाले जानकारी दिनुभयो ।

उहाँका अनुसार दुई केटा र दुई केटी खेलाडी छनोट गरिएको हो । केटा तर्फ शिखर केसी र रोहित ओली तथा केटी तर्फ सुहाना बुढा मगर र साहाना बुढा मगर छनोट भएका हुन् । उनीहरूले जेठ १९ देखि २१ गतेसम्म कर्णाली प्रदेशको राजधानी सुर्खेतमा हुने छनोटमा भाग लिने छन् । 

यसबाट छनोट भएका खेलाडीले जेठ ३०–३२ सम्म गण्डकी प्रदेशको पोखरामा हुने १५ वर्षमुनिको राष्ट्रिय ब्याडमिन्टन प्रतियोगितामा भाग लिन पाउने कर्णाली प्रदेश ब्याडमिन्टन सङ्घका उपाध्यक्ष समेत रहनुभएका बुढाले जानकारी दिनुभयो ।।