रुकुम पश्चिमको सानीभेरी गाउँपालिकाले ४ जना पत्रकारसहित विभिन्न क्षेत्रमा योगदान पुर्याउने व्यक्तीलाई सम्मान गरेको छ । गाउँपालिकाले १५ औं गाउँसभाको अवसरमा पत्रकार सहित विभिन्न क्षेत्रबाट योगदान पुर्याउने ३३ जना व्यक्तीलाई सम्मान गरेको हो । सम्मान हुनेमा रेडियो सानीभेरी एफएममा बजार व्यवस्थापकको रुपमा कार्यरत देबकुमार ओली, नेपाल टेलिभिजन रुकुम पश्चिम संवाददाता अमरराज पुन, गोरखापत्र दैनिकका रुकुम संवाददाता राजु लामिछाने र रेडियो मौराखारामा कार्यरत पत्रकार खिमबहादुर ओलीलाई सम्मान गरिएको हो ।
पत्रकारिताको क्षेत्रबाट जनतालाई खबर र सूचनामा जोड्दै सूचनाको हकलाई स्थापित गर्न अहोरात्र समर्पित भई समाचारका माध्यामबाट पुर्याएको योगदानको मुल्यांकन गर्दै उहाँहरुलाई सम्मान पत्रले सम्मान गरिएको सानीभेरी गाउँपालिका प्रवक्ता पहसिंह घर्तीले जानकारी दिनुभयो । उहाँका अनुसार पालिकालाई प्रत्यक्ष तथा अप्रत्यक्ष रुपमा सहयोग पुर्याउने अन्य २९ जना व्यक्तीलाई पनि सम्मान गरिएको छ ।
सम्मान हुनेमा गाउँपालिकाका पुर्व अध्यक्ष नरबहादुर पुन, उपाध्यक्ष इन्दिरा ओली रहनु भएको छ । त्यस्तै पालिकामा कार्यरत कर्मचारी तथा शिक्षक गरी २३ जना, २ जना सुरक्षाकर्मी र पालिका भरबाट २०८० सालको एसइईमा उत्कृष्ट अंक प्राप्त गर्ने ज्ञानोदय मावि सिम्लीमा अध्यनरत छात्र टेकराज ओली र छात्रा दिपा केसीलाई पनि सम्मान पत्रले गाउँसभाको अवसरमा सम्मान गरिएको गाउँपालिका प्रवक्ता घर्तीले जानकारी दिनुभयो ।
