रुकुम पश्चिमको मुसीकोट नगरपालिकामा पाँच वर्षको अवधिमा मुख्यमन्त्री रोजगार कार्यक्रमबाट २ हजार बढी युवाले रोजगार पाएका छन् । आर्थिक वर्ष २०७६/०७७ देखि हालसम्म नगरभित्रका २ हजार ७ सय ५१ जनाले रोजगार पाएका हुन् ।मुख्यमन्त्री रोजगार कार्यक्रमबाट पाँच वर्षको अवधिमा हालसम्म नगरपालिका २ हजार ७ सय ५१ व्यक्तिले रोजगार पाएको मुसीकोट नगरपालिका रोजगार संयोजक मायाँकुमारी श्रीवास्तवले जानकारी दिनुभयो ।
उहाँका अनुसार पाँच वर्षको अवधिमा मुख्यमन्त्री रोजगार कार्यक्रमबाट १३ करोड ६० लाख ४६ हजार रुपैयाँ खर्च भएको छ । आर्थिक वर्ष २०७६/०७७ मा स्वीकृत १ करोड ३ लाख ७३ हजार बजेटबाट ६ सय १ जनाले रोजगार प्राप्त गरेका थिए । त्यस्तै आर्थिक वर्ष २०७७/०७८ मा ५ करोड ६२ लाख ५४ हजार बजेटबाट १ हजार १ सय ४७ व्यक्तीले रोजगार पाएको रोजगार संयोजक श्रीबास्तवले जानकारी दिनुभयो ।
त्यसैगरी आर्थिक वर्ष २०७८/०७९ मा ४ करोड ७४ लाख १९ हजार बजेटबाट ७ सय ७३, आर्थिक वर्ष २०७९/०८० मा स्वीकृत २ करोड १० लाख बजेटबाट २ सय ३० व्यक्तिले रोजगार प्राप्त गरेका थिए ।आर्थिक वर्ष २०८०/०८१ मा २ करोड १० लाख बजेटमा मुख्यमन्त्री रोजगार कार्यक्रम अन्तर्गत काम भएकोमा कति जनाले रोजगार प्राप्त गरे त्यसको विवरण आउन बाँकी रहेको रोजगार संयोजक श्रीबास्तवले जानकारी दिनुभयो ।
मुख्यमन्त्री रोजगार कार्यक्रमबाट गोरेटो बाटो निर्माण, खेलकुद मैदान निर्माण, घेराबार लगायतका अन्य विकास निर्माणका काम सम्पन्न भएको मुसीकोट नगरपालिकाले जनाएको छ ।
