जिल्ला प्रशासन कार्यालय रुकुम पश्चिमले पुँजीगततर्फ ९९ दशमलव ६८ प्रतिशत खर्च गरेको छ । गत आर्थिक वर्षमा कार्यालयले पुँजीगत तर्फ १४ लाख बजेट रहेकामा ९९ दशमलव ६८ प्रतिशत अर्थात १३ लाख ९५ हजार ९ सय ८९ बजेट खर्च गरेको हो । आइतबार जिल्ला प्रशासन कार्यालयमा पत्रकार भेटघाट कार्यक्रमको आयोजना गरी प्रमुख जिल्ला अधिकारी हरिप्रसाद पन्तले प्रशासन कार्यालयबाट गत वर्षमा सम्पादन भएका कामहरुको जानकारी गराउनुभएको हो ।
प्रमुख जिल्ला अधिकारी पन्तका अनुसार कार्यालयले चालु तर्फ २ करोड ९ लाख १९ हजार ८ सय बजेट रहेकामा ९५ दशमलव २३ प्रतिशत अर्थात १ करोड ९९ लाख २२ हजार ६ सय ७९ रुपैयाँ खर्च भएको छ । चालु तर्फ राष्ट्रिय परिचय पत्रमा ८ लाख ९४ हजार बजेट रहेकामा ९५ दशमलव २९ प्रतिशत अर्थात ८ लाख ५१ हजार ८ सय ९० रुपैयाँ खर्च भएको उहाँले जानकारी दिनुभयो ।
त्यस्तै जिल्ला प्रशासन कार्यालयले एक वर्षको अवधिमा ३ करोड ५२ लाख १९ हजार १ सय ५९ राजस्व संकलन गरेको छ । प्रशासनिक दण्ड जरिवाना, राहदानी दस्तुर, संस्था दर्ता तथा नविकरण, हात हतियार विष्टफोटक पदार्थ, अनुमती इजाजत तथा नामसारीबाट राजस्व संकलन भएको प्रमुख जिल्ला अधिकारी पन्तले बताउनुभयो । त्यस्तै आर्थिक वर्ष २०८०/०८१ मा जिल्ला प्रशासन कार्यालयबाट ५ हजार ८ सय २ वटा नागरिकता प्रदान गरिएको छ । भने ३ हजार ५ सय ३ जनाले नागरिकताको प्रतिलिपी लिएका छन् ।
९ जनाले नागरिकता त्याग गर्दा ६ जनाले गैर आवसिय नागरिकता प्राप्त गरेका छन् । प्रशासन कार्यालयबाट १ सय ८९ नाबालक परिचय पत्र प्रदान गर्दा ३ हजार ३ सय ५७ जनाले राहदानी बनाएको जिल्ला प्रशासन कार्यालय रुकुम पश्चिमले सार्वजनिक गरेको तथ्यांकमा उल्लेख गरिएको छ । 
