अमेरिकामा लुटेराबाट मारिएका रुकुम पश्चिमको बाँफिकोट गाउँपालिका वडा नम्बर १० सेजेका ३० वर्षीय दीपक ओलीको अन्त्येष्टि आइतबार गरिने भएको छ । टेक्ससको एक ग्यास स्टेसनमा कार्यरत ओलीको गत आइतबार बिहान ५ बजेतिर बन्दुकधारी लुटेराले गोली हानी हत्या गरेका थिए । निधन भएको एक सातापछि दीपकको अन्त्येष्टि गर्न लागिएको उहाँका आफन्त गोर्ख कुसारीले जानकारी दिनुभयो ।

उहाँका अनुसार दीपकको अन्त्येष्टि अगस्ट ४ अर्थात् आइतबार भोली अमेरिकाको समय अनुसार बिहान ९ बजे Providence-Jones Family Funeral Home 604 State Hwy 95, Elgin, TX 78621 मा गरिने छ । अन्त्येष्टिमा सहभागीताका लागि अमेरिकामा रहने सबै नेपालीहरूलाई अनुरोध गरिएको छ । दीपककाे अहिले शव गृहमा राखिएकाे र आइतबार शव बुझेर अन्त्येष्टि गरिने कुसारीले बताउनुभयाे ।

दीपक ८० लाख खर्चिएर गत वर्ष मात्र अमेरिका जानुभएको थियो । उहाँका घरमा ५ बर्सिया छोरी, श्रीमती, आमा र बुवा रहनुभएको छ ।

यसैबिच दीपकको परिवारका लागि सहयोग समेत सङ्कलन भइरहेको छ । अमेरिकामा करिब डेढ करोड सहयोग सङ्कलन भएको बताइएको छ भने नेपालमा पनि सहयोग सङ्कलन चलिरहेको छ । बाँफिकोट गाउँपालिका वडा नम्बर १० का अध्यक्ष हरि चन्दको नेतृत्वमा सहयोग सङ्कलन अभियान सञ्चालन भइरहेको छ । अमेरिकामा गोर्ख कुसारी र मोहन कुसारी लगायतको नेतृत्वमा सहयोग सङ्कलन भइरहेको छ ।