नेपालको महिला पुरुष दुवै टिम भुटानको राजधानी थिम्पुमा जारी काभा बिच भलिबलको फाइनलमा पुगेको छ । आज भएकाे सेमिफाइनल जित्दै महिला पुरुष दुवै टाेली प्रतियाेगिताकाे फाइनलमा पुगेको हाे । पुरुष तर्फ मानबहादुर श्रेष्ठ र दिलबहादुर सुनारकाे जोडी माल्दिभ्सकाे बि टिमलाई पराजित गर्दै उपाधि नजिकै पुगेको हाे । थिम्पुस्थित चाङ्लिमिथाङ राष्ट्रिय रंगशालामा नेपालले माल्दिभ्स बी लाई २१-१०, २१-१६ को सेटमा हराएकाे हाे । 

यसअघि आजै भएकाे महिला तर्फकाे सेमिफाइनलमा नेपालले उज्वेकिस्तानलाई २-० को सेटमा सहजै पराजित गर्दै उपाधि नजिक पुगेको हो । मनिषा चौधरी र कमला पुनको जोडीले उज्वेकिस्तानलाई २१-१३, २१-१२ ले हरायो । नेपाली टोली समूह चरणमा खेलेको तीन वटै खेल जित्दै अपराजित रहेर सेमिफाइनल पुगेको थियो ।