रुकुम पश्चिमको मुसिकोटमा खोलामा बगेर एक जनाको मृत्यु भएको छ । मुसिकोट नगरपालिका वडा नम्बर ७ झुलखेतका ५० वर्षीय तेजबहादुर बुढाको चुनखाेलामा बगेर मृत्यु भएको हो ।

वडा नम्बर ६ र ७ को सिमाना झुलखेतबाट बगेका बुढाकाे शव वडा नम्बर ३ र १३ को बिचमा पर्ने काउलेचाैरस्थित मुग्लुखाेलाबाट निकालिएको हो ।

जिल्ला प्रहरी प्रमुख प्रहरी नायव उपरीक्षक नवराज पोखरेलको नेतृत्वमा खटिएको प्रहरी टोलीले काउलेचाैरकाे झोलुङ्गे पुल नजिकै मुग्लुखाेलामा बगिरहेको अवस्थामा शव फेला पारेको हो ।

बुढा घरायसी झगडा पछि मर्छु भनेर घरबाट निस्किएको जानकारी प्राप्त भएको डिएसपी पोखरेलले बताउनुभयो । बुढाले खोलामा हाम फालेर आत्महत्या गरेको हुनसक्ने उहाँले बताउनुभयो ।

बुढा शव पोस्टमार्टमका लागि जिल्ला अस्पताल सल्ले लैजाँदै गरेको प्रहरीले जनाएको छ ।