रुकुम पश्चिममा अवरुद्ध मध्यपहाडी लाेकमार्ग सुचारु भएको छ । मुसिकोट नगरपालिका वडा नम्बर ८ का विभिन्न ठाउँमा अवरुद्ध भएको सडक नगरपालिकाले आफ्नो डोजर प्रयोग गरेर खुलाएको हो ।

वर्षाका कारण मुसिकोट ८ का रिन दह लगायतका ठाउँमा पहिरो खस्दा शनिवार देखि मध्यपहाडी लाेकमार्ग अवरुद्ध थियो । जसका कारण रुकुम पश्चिमबाट रुकुम पूर्व हुँदै राजधानी काठमाडौँ लगायत देशका विभिन्न ठाउँ जाने र रुकुम पश्चिम आउने सयौँ यात्रुहरू अलपत्र परेका थिए ।

समयमा लाेकमार्ग नखुलाउँदा यात्रुहरू शनिवार राती सडकमै रात बिताएका थिए । तर मुसिकोट नगरपालिकाले आइतबार डोजर लगाएर पहिरो पन्छाएर बाटो खुलाएको नगर प्रहरी प्रमुख उमेश केसीले जानकारी दिनुभयो ।

मध्यपहाडी लाेकमार्ग आयोजना कार्यालय दैलेखले सडक खुलाउन बेवास्ता गरेपछि नगरपालिकाले सडक खुलाएको उहाँले बताउनुभयो । आइतबार अपराह्न देखि मध्यपहाडी लाेकमार्गकाे मुसिकोट-रूकुमकाेट सडक खण्ड सुचारु भएको नगर प्रहरी प्रमुख केसीले बताउनुभयो ।

ठाउँ ठाउँमा पहिरो खसिरहने समस्याका कारण यो वर्षको वर्षायाममा मध्यपहाडी लाेकमार्गकाे मुसिकोट-रूकुमकाेट खण्ड धेरै नै अवरुद्ध भइरहेको छ । सडक सुचारु गर्न सम्बन्धित निकायले तदारुकता नदेखाउँदा यात्रुले धेरै सास्ती बेहोरिरहेका छन् ।

रुकुम पूर्वको सिस्ने गाउँपालिकाको रानीकाेट, मुसिकोटको किटेनी, रिन दह लगायतका ठाउँमा पहिरोले सताइरहेको छ ।