रुकुम पश्चिम जिल्ला अस्पतालमा ब्लड बैङ्क स्थापना भएपछि सहज भएको छ । जिल्ला अस्पतालमा उपचार गराउन आउनेहरूलाई रगत आवश्यकता परेको खण्डमा समस्या भइरहेकामा गत वर्ष ब्लड बैङ्क स्थापना भएपछि भने हाल सजिलो भएको छ । विभिन्न कारणले रगत चढाउनुपर्ने बिरामीलाई ब्लड बैङ्कले सहज बनाएको हो । जिल्ला अस्पतालमा २०८० कार्तिक १३ गते ब्लड बैङ्क स्थापना भएको थियो । यसमा रूपान्तर नेपाल, नेपाल रेडक्रस सोसाइटी लगायतले सहयोग गरेका छन् ।

जिल्लामा ब्लड बैङ्क स्थापना भएदेखि हालसम्म ९३ जनाले रगत दान गरेका छन् । केही स्वतःस्फूर्त रक्तदान गर्नेहरू छन् भने अधिकांश बिरामीलाई आवश्यक परेपछि रक्तदान गर्नेहरू छन् । हालसम्म ९३ जनाले रक्तदान गरेकामा ९० जना बिरामीलाई रगत दिइएको ब्लड बैङ्कका ल्याब टेक्निसियन पुष्कर केसीले जानकारी दिनुभयो । उहाँका अनुसार चालु आर्थिक वर्षको साउन महिनामा मात्र १२ जनाले रक्तदान गरिसकेका छन् ।

जिल्ला अस्पतालमा ब्लड बैङ्क स्थापना भएपछि धेरै नै सजिलो भएको उहाँको भनाई थियो । 'पहिला रगतका लागि भाैतारिनुपर्ने अवस्था थियो, ब्लड बैङ्क स्थापना भएपछि भने रगतको व्यवस्थापन गर्न धेरै नै सहज भएको छ, उहाँले भन्नुभयो ।' अहिले आफैँ पनि स्वतःस्फूर्त रूपमा रक्तदान गर्नका लागि व्यक्तिहरू आइरहेको र रगत आवश्यकता परेको अवस्थामा रक्तदाता खोजी गर्न सहज भएको उहाँले बताउनुभयो ।

‘केही मात्रामा हामीसँग रगत स्टक हुन्छ, स्टक सकिएको वा नभएको अवस्थामा हामीसँग धेरै रक्तदाताहरूको रेकर्ड छ त्यसबाट समय पुगेकाहरूलाई रक्तदानका लागि अनुरोध गर्छौँ, उहाँले भन्नुभयो–अनुरोध गरिएकाहरूले नाइँ भन्नुहुन्न ।’ ब्लड बैङ्क स्थापना भए देखि रगत अभावका कारण बिरामीको उपचार नरोकिएको चिकित्सकहरूको भनाई छ ।