नेपाल विद्यार्थी सङ्घ (नेविसंघ) रुकुम पश्चिमको जिल्ला अध्यक्षमा हेमराज केसी नियुक्त हुनुभएको छ । जिल्लाको सानीभेरी गाउँपालिका वडा नम्बर ९ सिम्ली निवासी विद्यार्थी नेता केसीलाई मङ्गलवार नेविसंघ केन्द्रीय अध्यक्ष दुजाङ शेर्पाले जिल्ला अध्यक्षमा नियुक्त गर्नुभएको हो । अध्यक्ष शेर्पाले नेविसंघ रुकुम पश्चिमको लामो समयदेखि रिक्त अध्यक्ष पदमा संघको विधान २०२७ को छैटौँ संशोधन २०७५ बमोजिम तीन महिनाभित्र जिल्ला अधिवेशन सम्पन्न गर्ने गरी केसीलाई अध्यक्षको जिम्मेवारी दिनुभएको हो ।

नेविसंघ रुकुम पश्चिमका पूर्व सह-सचिव एव सानीभेरी गाउँपालिका संयोजक समेत रहेका केसीले २०७३ मा त्रिचन्द्र क्याम्पस नेविसंघको इकाई सदस्यका रुपमा समेत काम गर्नुभएको थियो । नवनियुक्त अध्यक्ष केसीले सङ्गठनले आफूलाई ठुलो जिम्मेवारी सुम्पिएको र यसलाई पुरा गर्ने प्रतिबद्धता जनाउनुभयो । जिल्लास्थित नेताहरूसँग छलफल तथा समन्वय गरेर तोकिएको समय भित्र नेविसंघ रुकुम पश्चिमको नयाँ नेतृत्व निर्माण गर्ने उहाँको भनाई छ ।