रुकुम पश्चिमको मुसिकोट नगरपालिका  वडा नम्बर १ पातुखोलामा पहिरोले ४ वटा घुम्ती पसल  बगाएको छ । शुक्रबार साँझ राप्ती राजमार्गको खलंगा सल्ले सडक खण्डको पातुखोला सडक छेउमा सञ्चालन रहेका  ४ वटा घुम्ती पसल पहिराले बगाएको हो । चारवटा घुम्तीमा बगाउँदा करिव २४ लाख रुपैयाँ बराबरको क्षति पुगेको जिल्ला प्रहरी कार्यालय रुकुम पश्चिमका सूचना अधिकारी प्रहरी निरीक्षक ऋषी पाठकले जानकारी दिनुभयो ।

उहाँका अनुसार सेविका बोहरा केसीको यसिया तरकारी तथा फलफुल पसलमा ५ लाख, अस्मिता खड्काको किराना पसलमा ८ लाख बराबरको क्षति पुगेको छ ।  त्यस्तै धनमाया खत्रीको किराना पसलमा ५ लाख र प्रेमकला विकको कस्मेटिक पसलमा ६ लाख गरेर जम्मा २४ लाख रुपैँया बराबरको क्षति  पुगेको प्रहरी निरीक्षक पाठकले जानकारी दिनुभयो ।

तिजपर्वमा पसल बन्द रहेकाले मानवीय क्षेती भने भएको छैन् । शुक्रबार अनुमानित क्षेतिको विवरण संकलन गरिएकामा आज पहिरोले बगाएर पुरिएका घुम्ती पसल तथा पसल भित्र रहेका केहि बाँकी रहेका सामान निकालिने जिल्ला प्रहरी कार्यालय रुकुम पश्चिमले  जनाएको छ ।