बागलुङमा भएको गाडी दुर्घटनामा रुकुम पूर्वको पुथाउत्तरगंगा गाउँपालिका उपाध्यक्ष भुपेन्द्रा बुढासहित तीन जनाको मृत्यु भएको छ ।

रा १ झ २०० नम्बरको सरकारी गाडी आज बिहान पौने ९ बजेतिर बागलुङको गलकोट नगरपालिका वडा नम्बर २ भुङखानीमा दुर्घटना भएको थियो । उक्त गाडीमा पुथाउत्तरगंगा गाउँपालिका उपाध्यक्ष भुपेन्द्रा बुढा र केही कर्मचारीहरु सवार थिए ।

बागलुङका प्रमुख जिल्ला अधिकारी नेत्रप्रसाद सुवेदीले दुर्घटनामा पुथाउत्तरगंगा गाउँपालिका उपाध्यक्ष भुपेन्द्रा बुढाको मृत्यु भएको बताउनुभयाे । दुर्घटनामा उहाँकी आमा समेत परेकाे बताइएकाे छ । गाउँपालिका उपाध्यक्षको मृत्यु भएको पुष्टि भएको र अरुको भने सनाखत हुन बाँकी छ उहाँले बताउनुभयाे । बुढा २०७९ मा भएकाे स्थानीय तहकाे निर्वाचनमा नेकपा माओवादीकाे तर्फबाट गाउँपालिका उपाध्यक्षमा निर्वाचित हुनुभएकाे थियाे ।