नेपाल क्रिकेट सङ्घ क्यानले आयोजना गर्न लागेको नेपाल प्रिमियर लिग (एनपिएल)को मार्की खेलाडीको टुङ्गो लागेको छ । क्यानले राष्ट्रिय टिमका ८ जना खेलाडीलाई मार्की खेलाडीका रुपमा सार्वजनिक गरेको थियो । आज उक्त खेलाडीको गोला प्रथा मार्फत टिमले मार्की खेलाडी प्राप्त गरेका छन् ।
काठमाडौंमा एक कार्यक्रमको आयोजना गरी मार्की खेलाडीको गोला प्रथा मार्फत बाँडफाँड गरिएको क्यानले जनाएको छ । जसअनुसार टिम कर्णालीको मार्की खेलाडीमा सोमपाल कामी परेका छन् । काठमाडौँको मार्कीमा करण केसी, पोखराको मार्कीमा कुशल भुर्तेल, विराटनगरको मार्कीमा सन्दीप लामिछाने र लुम्बिनीको मार्की खेलाडीमा नेपाली राष्ट्रिय क्रिकेट टिमका कप्तान रोहित पौडेल परेका छन् ।
त्यस्तै दीपेन्द्रसिंह ऐरी सुदूरपश्चिम, कुशल मल्ल चितवन र आशिफ शेख जनकपुरको मार्की खेलाडी बनेका छन् । मार्की खेलाडीको मूल्य २० लाख रहेको नेपाल क्रिकेट सङ्घ क्यानका प्रवक्ता छुम्बी लामाले जानकारी दिनुभयो । ८ टोलीको सहभागिता रहने एनपिएलको पहिलो संस्करण मङ्सिर १५ देखि पुस ६ गते सम्म हुनेछ ।
