रुकुम पश्चिमको सदरमुकाम मुसिकोट खलङ्गामा आज देखि वडा स्तरीय महिला तथा पुरुष भलिबल प्रतियोगिता सुरु हुँदै छ । रुकुम पश्चिम भलिबल केन्द्रले गत वर्षबाट सुरु गरेको ‘जनक सुदन स्मृति कप भलिबल’को दोस्रो संस्करण आज देखि सुरु हुन लागेको हो । पूर्व भलिबल खेलाडी द्वय जनक शाह र सुदन श्रेष्ठको स्मृतिमा रुकुम पश्चिम भलिबल प्रशिक्षण केन्द्रले गत वर्ष देखि ’जनक–सुदन स्मृति कप रनिङ शिल्ड भलिबल प्रतियोगिता’को आयोजना गरिरहेको छ ।
दिउँसो १ बजे मुसिकोट नगरपालिकाका प्रमुख महेन्द्र केसीले प्रतियोगिताको उद्घाटन गर्ने बताइएको छ । प्रतियोगितामा पुरुष तर्फ रुकुम पश्चिम, जाजरकोट, रोल्पा, रुकुम पूर्व लगायत जिल्लाका २४ वटा टिमले प्रतिस्पर्धा गर्न लागेको आयोजकले जनाएको छ । महिला तर्फ भने ८ टिमको सहभागिता रहने छ ।
प्रतियोगिता जिल्ला सदरमुकाम मुसिकोट खलङ्गाको बराहटाकुरामा सञ्चालन हुने छ । यो वर्ष पुरुष तर्फको पुरस्कार केही घटाइएको छ भने महिला तर्फ खुला प्रतिस्पर्धा बनाउँदै पुरस्कार बढाइएको आयोजक रुकुम पश्चिम भलिबल प्रशिक्षण केन्द्रका अध्यक्ष तेज बुढाले जानकारी दिनुभयो । पुरुष तर्फको विजेताले १ लाख ११ हजार रुपैयाँ नगद, शिल्ड, कप, मेडल र प्रमाणपत्र पाउँदा उप विजेताले ७१ हजार नगद, कप, मेडल र प्रमाणपत्र प्राप्त गर्ने छ ।
तेस्रो हुने टिमले ४१ हजार नगद कप, मेडल र प्रमाणपत्र प्राप्त गर्ने बुढाले जानकारी दिनुभयो । गत वर्षको पहिलो संस्करणमा विजेता पुरस्कार १ लाख ५१ हजार, उप विजेता पुरस्कार १ लाख १ हजार र तेस्रो पुरस्कार ५१ हजार रहेको थियो । पुरुष तर्फ व्यक्तिगत इभेन्टमा उत्कृष्ट खेलाडीले ५ हजार तथा वेस्ट स्पाइकर, वेस्ट सर्भर, वेस्ट लिवेरो र वेस्ट ब्लकरले समान ३ हजार पुरस्कार पाउने छन् ।
त्यस्तै महिला तर्फको विजेताले ७५ हजार, उपविजेताले ५५ हजार र तेस्रो हुनेले ३५ हजार नगद कप, मेडल र प्रमाण पत्र प्राप्त गर्ने अध्यक्ष बुढाको भनाई छ । महिला तर्फ पनि विजेताले शिल्ड प्राप्त गर्ने छ । शिल्ड कब्जा गर्नका लागि भने लगातार तीन वर्ष शिल्ड जितेको हुनुपर्ने छ ।
महिला तर्फ व्यक्तिगत इभेन्टमा उत्कृष्ट खेलाडीले नगद ३ हजार तथा वेस्ट स्पाइकर, वेस्ट सर्भर, वेस्ट लिवेरो र वेस्ट ब्लकरले समान २ हजार पुरस्कार पाउने छन् । गत वर्ष महिला तर्फ विजेता पुरस्कार ५१ हजार, उपविजेता पुरस्कार ३१ हजार र तेस्रो पुरस्कार २१ हजार रहेको थियो ।
यो प्रतियोगिता वडा स्तरीय हो । यो वर्ष पुरुष तर्फ कर्णाली प्रदेश भित्रका वडा स्तरीय र महिला तर्फ भने खुला रहेको आयोजकले जानकारी गराएको छ । पुरुष तर्फ रुकुम पूर्व र रोल्पाका वडाहरूले पनि भाग लिने पाउने बताइएको छ । पहिलो संस्करणको उपाधि पुरुष तर्फ बागलुङको निसिखोला गाउँपालिका २ र महिला तर्फ बाँफिकोट गाउँपालिका ४ ले जितेको थियो ।
