रुकुम पश्चिममा पछिल्लो २४ घण्टामा ४३ जना कोरोना संक्रमित थप भएका छन् । जिल्ला अस्पताल र तीन स्थानीय तहमा ७२ जनामा गरिएको परीक्षणबाट ४३ जनामा कोरोना भाइरसको संक्रमण पुष्टि भएको हो ।
पिसिआर परीक्षणबाट चौरजहारी नगरपालिकामा १६ जना संक्रमित थपिएका हुन् । २८ जनामा परीक्षण गर्दा १६ जनामा संक्रमण पुष्टि भएको हो । जिल्ला अस्पतालमा १५ जनामा एन्टीजेन परीक्षण गर्दा १३ जना र आठबीसकोट नगरपालिकामा १३ जनामा एन्टीजेन परीक्षण गर्दा १० जना संक्रमित थपिएको स्वास्थ्य सेवा कार्यालय जनाएको छ ।
त्यस्तै जिल्लाको त्रिवेणि गाउँपालिकामा गरिएको परीक्षणबाट ४ जनामा संक्रमण देखिएको छ । १६ जनामा एन्टीजेन परीक्षण गर्दा ४ जनाको रिपोर्ट पोजेटिभ आएको बताईएको छ । जिल्लामा नयाँ भेरियन्ट सहितको संक्रमण फैलिएपछि दैनिक दोहोरो अंकमा संक्रमितहरु थपिइरहेका छन् । जिल्लामा अहिलेसम्म ६ जना कोरोना संक्रमितको मृत्यु भइसकेको छ ।
