रुकुम पश्चिमको चौरजहारी अस्पतालमा ५० वटा अक्सिजन सिलिण्डर ल्याईपुर्याईएको छ । अस्पतालमा आज ५० लिटरका ५० वटा सिलिण्डर र आवश्यक औषधि आईपुगेका हुन् । नयाँ भेरियन्ट सहितको कोरोना भाइरस फैलिएपछि पूर्व गृहमन्त्री तथा प्रतिनिधि सभा सदस्य जनार्दन शर्मा प्रभाकरको पहलमा अस्पतालमा अक्सिजन सिलिण्डर र विभिन्न प्रकारका औषधि पुगेका छन् । कोरोना संक्रमितको उपचारका लागि अक्सिजन सिलिण्डर र औषधि ल्याईएको हो । 

आज अस्पतालमा पुगेर उक्त सिलिण्डर तथा औषधि नेता शर्माले अस्पताललाई हस्तान्तरण गर्नुभएको छ । नगर प्रमुख विशाल शर्मा, अस्पतालका प्रशासक डिलवहादुर गिरी, डाक्टर कालेव बुढा लगायतलाई उक्त सामग्रि हस्तान्तरण गर्नुभएको हो । कोरोनाका बिरामिको उपचारको लागि अस्पतालमा १८ बेडको आईसोलेसन रहेको छ । त्यस्तै नगरपालिकाले खोलागाउँमा १५, कोटजहारीमा १५ र सेवा केन्द्रमा १५ गरी ४५ वेडको आईसोलेसन वार्ड तयार पारिसकेको छ । त्यस्तै अन्य केहि सार्वजनिक भवनमा पनि आईसोलेसन वार्ड तयारीको काम चलिरहेको नगरपालिकाले जनाएको छ । 

नयाँ आएको अक्सिजन र नगर तथा अस्पतालमा यसअघि नै रहेका अक्सिजनलाई आवश्यकता अनुसार नगरमा निर्माण गरिएका आईसोलेसन वार्डमा प्रयोग गर्ने नगर प्रमुख विशाल शर्माले जानकारी दिनुभयो । सामग्रि हस्तान्तरण गर्दै नेता शर्माले भएका स्रोत साधन र सामग्रिको प्रयोगमा राम्रो काम गर्न निर्देशन दिनुभयो । ‘ठुलो दुःखका साथ ५० वटा अक्सिजन सिलिण्डर ल्याउन सफल भएका छौं, उहाँले भन्नुभयो, चौरजहारीमा भर्न मिल्ने खालको अक्सिजन प्लान्ट निर्माण हुँदै छ, अन्य सामग्रिको पनि व्यवस्थापन हुन्छ, अहिले जे छ त्यसैबाट राम्रो सेवा दिएर मान्छे ज्यान बचाउनुहोस् ।’ उहाँले चौरजहारी अस्पताल, आईसोलेसन लगायतको अनुगमण गर्दै आवश्यक निर्देशन दिनुभएको हो ।