नेपाल लाइफ इन्स्योरेन्स मुसिकोट उपशाखाले वैदेशिक रोजगारीमा ज्यान गुमाएका एक व्यक्तिका परिवारलाई मृत्यु दाबी रकम प्रदान गरेको छ । रुकुम पश्चिमको त्रिवेणी गाउँपालिका ९ का इन्द्रबहादुर केसीको परिवारलाई मृत्यु दाबी रकम प्रदान गरिएको हो । इन्द्रको वैदेशिक रोजगारीको सिलसिलामा मेलेसियामा मृत्यु भएको थियो । उहाँले वैदेशिक रोजगारी म्यादी बिमा गर्नुभएको थियो ।
१० लाखको बिमा गरेकामा उक्त बिमा बापतको १४ लाख दाबी रकम बुधवार इन्द्रकी श्रीमती कमला बस्नेत केसीलाई हस्तान्तरण गरिएको नेपाल लाइफ इन्स्योरेन्सका कर्मचारी खीमप्रकाश विष्टले जानकारी दिनुभयो । उहाँका अनुसार सन् २०२२ मा बिमा गरेकामा इन्द्रले प्रतिवर्ष ३ हजार ७ सय ८ रुपैयाँका दरले २ किस्ता बुझाउनुभएको थियो । बुधवार एक कार्यक्रमका बिच मृत्यु दाबी रकम हस्तान्तरण गरिएको हो ।
नेपाल लाइफ इन्स्योरेन्स मुसिकोट शाखाका प्रमुख हरिबहादुर बोहराले इन्द्रकी श्रीमती कमलालाई बिमा दाबी रकम हस्तान्तरण गर्नुभएको हो । १४ लाखको चेक हस्तान्तरण गरिएको र पैसा भने बैङ्क खातामा गएको बताइएको छ ।
