रुकुम पूर्वको सिस्ने गाउँपालिकाले दसैँ, तिहार लगायतका चाडपर्वलाई लक्षित गरी ग्रामीण सडक मर्मत सुरु गरेको छ । गाउँपालिकाले मङ्गलवार देखि विभिन्न वडाका सडक मर्मतको काम सुरु गरेको हो । मनसुनका कारण बिग्रिएका सडक मर्मतको काम सुरु गरिएको गाउँपालिकाले जनाएको छ ।
सडक मर्मतका लागि ३ वटा जेसिबि लगाइएको गाउँपालिका अध्यक्ष कृष्ण रेग्मीले जानकारी दिनुभयो । वडा नम्बर ५, ६, ७ र ८ मा गरी ३ वटा जेसिवि लगाइएको उहाँको भनाई छ । यी वडामा काम सकिएपछि अन्य वडामा सडक मर्मतको काम सुरु हुने उहाँले बताउनुभयो । बिहीबार देखि बडा दसैँ सुरु हुँदै छ ।
बर्सातले पालिकाका अधिकांश मुख्य तथा सहायक सडकहरू बिग्रिएका छन् । जसका कारण सवारी आवागमन तथा पैदल आवतजावत समेत प्रभावित भएको छ । चाडपर्वमा खाद्यान्न सामग्री ढुवानी तथा मान्छेको आवतजावत बढ्ने भएकोले सहजताका लागि बर्खामा बिग्रिएका सडक मर्मतको काम सुरु गरिएको गाउँपालिकाको भनाई छ ।
सिस्नेमा कुल ८ वडा रहेका छन् । जसमध्ये वडा नम्बर १ र २ मा हालसम्म सडक पुग्न सकेको छैन । अन्य वडाका अधिकांश टोलमा भने सडक पुगेको छ ।
