अमेरिकामा मारिएका रुकुम पश्चिमको बाँफिकोट गाउँपालिका वडा नम्बर १० सेजेका ३० वर्षीय दीपक ओलीको परिवारलाई आर्थिक सहयोग हस्तान्तरण गरिएको छ । वडा अध्यक्ष हरि चन्द र नेकपा माओवादी केन्द्रका बाँफिकोट गाउँपालिका अध्यक्ष चन्द्रबहादुर केसीको नेतृत्वमा सङ्कलन गरिएको सहयोग परिवारलाई हस्तान्तरण गरिएको हो । कुल २२ लाख १७ हजार ५ सय ३२ रुपैयाँ घर परिवारलाई हस्तान्तरण गरिएको छ । घरमै पुगेर वडाध्यक्ष चन्दको पहलमा सङ्कलन भएको १४ लाख ४६ हजार ९ सय ३२ रुपैयाँ र माओवादी केन्द्रका अध्यक्ष केसीको पहलमा सङ्कलन भएको ७ लाख ७० हजार ६ सय रुपैयाँ दीपककी आमा प्रतिमा ओली र बुवा लिले ओलीलाई हस्तान्तरण गरिएको हो ।

वडाध्यक्ष चन्दको पहलमा परिवारकै सदस्यकै बैङ्क खातामा सहयोग सङ्कलन अभियान थालिएको थियो । यसमा देश तथा विदेशमा रहेका विभिन्न सहयोगी व्यक्तिहरूले सहयोग रकम जम्मा गरिदिएको उहाँले बताउनुभयो । परिवारकै बैङ्क खातामा सहयोग सङ्कलन भएकोले बैङ्क स्टेटमेन्ट हेर्दा उक्त रकम जम्मा भएको पाइएको वडाध्यक्ष चन्दले जानकारी दिनुभयो । त्यस्तै माओवादी केन्द्रका पालिका अध्यक्ष केसीले भने आफ्नो पहलमा सहयोग सङ्कलन अभियान चलाएको र त्यसबाट जम्मा भएको रकम दीपकका परिवारलाई हस्तान्तरण गरेको बताउनुभयो । देश तथा विदेशमा रहेका र विशेष गरी अमेरिकामै रहेकाहरूले सहयोग गरेको उहाँको भनाई छ ।

८० लाख खर्चिएर गत वर्ष मात्र अमेरिका गएका दीपकको गत साउन दोस्रो साता काममै रहेको बेला बन्दुकधारी लुटेराले गोली प्रहार गरी हत्या गरेका थिए । उनी टेक्ससको वेको सिटी नजिक हाइवे–३५ को एक्जिट ३४६ मा रहेको एक ग्याँस स्टेसनमा कार्यरत थिए । 

यसैबिच अमेरिकामा रहेका नेपालीहरूले दीपकको परिवारका लागि करिब डेढ करोड भन्दा बढी सहयोग गरेका छन् । विभिन्न सहयोग अभियान मार्फत सङ्कलन भएको उक्त सहयोग हालसम्म परिवारलाई भने हस्तान्तरण गरिएको छैन । दीपकको घरमा आमा बुवा सहित श्रीमती र एक छोरी रहेकी छन् । दीपकको अमेरिकामै अन्त्येष्टि गरिएको थियो ।