रुकुम पश्चिमको सदरमुकाम मुसिकोटमा हरेक वर्ष सञ्चालन हुँदै आएको शिद्ध गुफा गोल्ड कप फुटबलको छैटौँ संस्करण असोज १९ गते शनिवार देखि हुने भएको छ । प्रतियोगिताको सबै तयारी पुरा भएको र शनिवार दिउँसो उद्घाटन हुने आयोजक सल्ले यूथ क्लब मुसिकोट नगरपालिका १ सल्लेले जनाएको छ । दसैँ, तिहार जस्ता चाडपर्वको अवसर पारी क्लबले हरेक वर्ष प्रतियोगिता आयोजना गर्दै आएको छ । छैटौँ संस्करणको विजेताले नगद ६६ हजार ६ सय ६६ रुपैयाँका साथमा ट्रफि, मेडल र प्रमाणपत्र प्राप्त गर्ने छ । उपविजेताले नगद ३३ हजार ३ सय ३३ रुपैयाँका साथमा ट्रफि, मेडल र प्रमाणपत्र प्राप्त गर्ने आयोजकले जनाएको छ ।

त्यस्तै व्यक्तिगत इभेन्टमा पनि खेलाडी पुरस्कृत गरिने छ । सर्वोत्कृष्ट खेलाडी, सर्वाधिक गोलकर्ता, सर्वोत्कृष्ट गोल रक्षक, सर्वोत्कृष्ट डिफेन्डर र उदीयमान खेलाडीलाई पुरस्कृत गरिने छ भने फेयर प्ले अवार्ड पनि वितरण गरिने बताइएको छ । प्रतियोगिता सेभन ए साइड भएकोले एउटा टिमले ७ जना खेलाडी खेलाउन पाउने आयोजकको भनाई छ । तर एक टिममा १० जना खेलाडी, एक जना प्रशिक्षक र एक जना व्यवस्थापक हुनुपर्ने, जिल्ला बाहिरबाट ३ जना खेलाडी राख्न पाइने, रुकुम पश्चिम र पूर्वलाई एउटै जिल्ला मानिने बताइएको छ ।

खलङ्गाको बराहटाकुरामा हुने प्रतियोगिता असोज २४ गतेसम्म सञ्चालन हुने छ । प्रतियोगितामा सहभागीताका लागि दर्ता शुल्क ७ हजार राखिएको छ भने प्रति पहेँलाे कार्ड २५० र रातो कार्डको लागि ५०० जरिवाना तोकिएको छ ।

विभिन्न व्यक्तिबाट सहयाेग जुटाएर प्रतियाेगिता सञ्चालन गर्न लागिएकाे आयाेजक सल्ले यूथ क्लबले जनाएकाे छ । प्रतियाेगिताकाे विजेता पुरस्कार ६६ हजार ६ सय ६६ रुपैयाँ मुसिकाेट नगरपालिका वडा नम्बर १ सल्ले घर भई हाल अमेरिकामा रहनुभएका कमल बुढाथाेकीले सहयाेग गर्नुभएकाे छ । त्यस्तै उप विजेता पुरस्कार ३३ हजार ३ सय ३३ रुपैयाँ मुसिकाेट १ सल्लेका हाल अमेरिकामा रहनुभएका कमल थापाले सहयाेग गरेकाे आयाेजककाे भनाई छ ।