रुकुम पूर्वको पुथाउत्तरगंगा गाउँपालिकाको कार्यपालिका बैठक पर्यटकीय स्थल सुन दहमा बसेको छ । गाउँपालिकाको ३१ औँ कार्यपालिका बैठक वडा नम्बर ३ मा रहेको सुन दहमा बसेको हो । सुन दहको प्रचार प्रसार तथा पर्यटन प्रवर्द्धन गर्ने उद्देश्यले कार्यपालिका बैठक समुन्द्री सतहबाट करिब ४ हजार ५ सय मिटर उचाइमा रहेको सुन दहमा राखिएको गाउँपालिका अध्यक्ष पुणिराज घर्तीले जानकारी दिनुभयो । गाउँपालिकाले पहिलो पटक खुला स्थानमा कार्यपालिका बैठक आयोजना गरेको हो ।

यो बैठकले विभिन्न कार्यविधिहरू अनुमोदन गर्नुका साथै विभिन्न निर्णयहरू समेत गरेको छ । सुन दहमा बसेको कार्यपालिका बैठकले सुन दह व्यवस्थापन तथा संरक्षण कार्यविधि २०८१ र सुन दह पर्यटन प्रवर्द्धन तथा आन्तरिक आय वृद्धि मापदण्ड २०८१, अनुमोदन गरेको गाउँपालिका अध्यक्ष घर्तीले बताउनुभयो । यसबाट पुथाउत्तरगङ्गा गाउँपालिकाको पर्यटन प्रवर्द्धनसँगै गाउँपालिकामा रोजगारी सृजना गर्ने लक्ष राखिएको छ । कार्यपालिका बैठकले बहुमूल्य जडीबुटी संरक्षण तथा व्यवस्थापन प्रतिवेदन, २०८१ समेत अनुमोदन गरेको छ । गाउँपालिकामा यार्सागुम्बा सहितका महत्त्वपूर्ण बहुमूल्य जडीबुटीहरू प्रशस्त पाइन्छन् ।

गाउँपालिका अध्यक्ष घर्तीका अनुसार स्थानीय मदिरा व्यवस्थापन तथा प्रवर्द्धन, बाह्य मदिरा नियन्त्रण कार्यविधि, २०८१ पनि अनुमोदन गरेको छ । कार्यपालिका बैठकले दुई वटा निर्णय समेत गरेको छ । पालिकामा रहेका संस्थागत तथा सामुदायिक विद्यालयहरूको स्थलगत अनुगमन गरी त्यसको प्रतिवेदन मङ्सिर मसान्त भित्र गाउँ शिक्षा समिति तथा कार्यपालिकामा पेस गर्ने निर्णय भएको छ । साथै गाउँपालिकाको हालसम्मको बेरुजु फर्छ्यौटका लागि लेखा समितिलाई जिम्मेवारी दिने निर्णय सुन दह कार्यपालिका बैठकले गरेको छ । शैक्षिक गुणस्तर बढाउने र सुशासन कायम गर्ने लक्ष सहित यी निर्णय गरेको गाउँपालिका अध्यक्ष घर्तीले जानकारी दिनुभयो ।