रुकुम पश्चिमको सानीभेरी गाउँपालिकामा प्रथम पालिका अध्यक्ष कप फुटबल प्रतियोगिता हुने भएको छ । सानीभेरी गाउँपालिका खेलकुद विकास समितिको आयोजनामा स्वास्थ्यका लागि खेलकुद राष्ट्रका लागि खेलकुद भन्ने नाराका साथ प्रथम पालिका अध्यक्ष कप खुला वडा स्तरीय फुटबल प्रतियोगिता हुने भएको हो । गाउँ खेलकुद विकास समितिकै आयोजनामा बुधवार मात्र वडा नम्बर ३ को बेलटापु खेल मैदानमा प्रथम पालिका स्तरीय क्रिकेट प्रतियोगिता सम्पन्न भएको थियो ।

उक्त प्रतियोगिता पश्चात् बेलटापु खेल मैदानमै फुटबल प्रतियोगिता आयोजना गरिएको सानीभेरी खेलकुद विकास समितिका सदस्य सचिव बालकुमार नकालले जानकारी दिनुभयो । प्रतियोगिताको विजेताले नगद ६० हजार, कप मेडल र प्रमाणपत्र प्राप्त गर्ने उहाँको भनाई छ । उहाँका अनुसार उपविजेताले नगद ४० हजार, कप, मेडल र प्रमाणपत्र प्राप्त गर्ने छ । उत्कृष्ट खेलाडीले नगद ३ हजार पुरस्कार पाउने नकालले बताउनुभयो ।

प्रतियोगितामा सहभागिताका लागि दर्ता शुल्क ५ हजार तोकिएको छ । कार्तिक २५ गतेसम्म टिम दर्ता गर्न सकिने र खेल २६ गतेबाट सुरु हुने छ । प्रतियोगिता वडा स्तरीय भएकोले सबै खेलाडीले आफ्नो परिचय खुल्ने कागजात अनिवार्य पेस गर्नुपर्ने सदस्य सचिव नकालको भनाई छ ।

सानीभेरी गाउँपालिकाले खेलकुद गतिविधिलाई तीव्रता दिएको छ । पालिकाले यो वर्षको राष्ट्रपति रनिङ शिल्ड समेत सम्पन्न गरिसकेको छ । जिल्लाका अन्य पालिकाको तुलनामा सानीभेरी गाउँपालिकाले खेलकुद गतिविधिमा जोड दिएको छ ।