रुकुम पूर्वको सदरमुकाम रुकुमकोटबाट काठमाडौँ जाँदै गरेको रात्रीबस बागलुङको निसिखोलामा दुर्घटना भएको छ । निसिखोला गाउँपालिका वडा नम्बर ६ जाहुलेपानीमा बस दुर्घटना भएको खबर आएको र आफूहरू घटनास्थलमा पुग्दै गरेको इलाका प्रहरी कार्यालय बुर्तिबाङका प्रहरी निरीक्षक आनन्द बस्नेतले जानकारी दिनुभयो । घटनामा मानवीय क्षति भएको खबर अहिलेसम्म प्राप्त नभएको उहाँले बताउनुभयो । तर १८, १९ जना यात्रु घाइते भएको उहाँको भनाई छ । उक्त घाइतेलाई स्वास्थ्य संस्थामा ल्याउँदै गरेको खबर प्राप्त भएको प्रहरी निरीक्षक बस्नेतले जानकारी दिनुभयो ।
गाडी रुकुमबाट काठमाडौँ जाँदै गरेको भन्ने सुनिएको र कुन गाडी हो, कति नम्बर को गाडी हो, कति यात्रु सवार थिए लगायतका अन्य विवरण खुल्न नसकेको उहाँले बताउनुभयो । दुर्घटना सामान्य छ भन्ने सम्म बुझिएको उहाँले बताउनुभयो । अन्य स्रोतबाट बुझ्दा बस घोडाघोडी यातायातको भएको बुझिएको छ ।
