राप्ती साहित्य परिषद् रुकुम पश्चिमका अध्यक्ष मनलाल ओलीले आफ्नी स्वर्गीय श्रीमतीको सम्झनामा करिब १५ लाख बराबरको जग्गा दान गर्नुभएको छ । श्रीमती राधा ओलीको स्मृतिमा आफू र आफ्ना सन्ततिको तर्फबाट राप्ती साहित्य परिषद्का नाममा मुसिकोट नगरपालिका ५ मा रहेको कित्ता नम्बर ३२८१ रहेको १ सय वर्गमिटर जग्गा दान गर्नुभएको हो । स्मृति भवन निर्माणका लागि जग्गा दान गरेको ओलीले बताउनुभयो ।

श्रीमतीका नाममा स्मृति भवन निर्माणका लागि आफूले परिषद्लाई जग्गा उपलब्ध गराएको उहाँले बताउनुभयो । तेस्रो कार्यकालका लागि परिषद्को अध्यक्ष रहनुभएका ओलीले सामाजिक सेवा र श्रीमतीको सम्झनाका लागि जग्गा उपलब्ध गराएको र यसमा परिषद्ले भवन निर्माण गर्ने निर्णय भएको बताउनुभयो । राधा ओलीको गत साउन २१ गते उपचारको क्रममा निधन भएको थियो ।