नेकपा एकीकृत समाजवादीले मङ्सिर १६ गते हुन लागेको स्थानीय तहको निर्वाचनका लागि रुकुम पूर्वको पुथाउत्तरगंगा गाउँपालिकाको उपाध्यक्षमा दिएको उम्मेदवारी फिर्ता लिएको छ । पार्टीका तर्फबाट उपाध्यक्षमा उम्मेदवारी दिनुभएकी सुनिता बुढाले उम्मेदवारी फिर्ता लिनुभएको हो । दुई पार्टीका बिचमा भएको सहमति अनुसार उम्मेदवारी फिर्ताका लागि दिइएको समयमा नेकपा एसकी उम्मेदवार बुढाले उम्मेदवारी फिर्ता लिनुभएको हो ।

नेकपा माओवादी केन्द्रका जिल्ला संयोजक कुमारी बराल र नेकपा एकीकृत समाजवादीका जिल्ला इन्चार्ज भीउमान घर्ती बिच मङ्गलवार उपनिर्वाचनमा सहकार्य गर्ने र नेकपा एसले उम्मेदवार फिर्ता गर्ने सहितका ५ बुँदे सहमति भएको थियो ।

त्यस्तै दुई पार्टी बिच उप–निर्वाचन प्रचारप्रसार अभियान संयुक्त रूपमा सञ्चालन गर्ने, जिल्लामा जिल्ला स्तरीय र ३ वटै स्थानीय तहमा पालिका स्तरीय राजनीतिक संयन्त्र गठन गरी विकास निर्माण लगायत अन्य काम सहमतिद्वारा गर्ने, राजनीतिक सहकार्यलाई दीर्घकालीनसम्म टिकाइराख्न वातावरण सिर्जना गर्ने र सहमतिको संयुक्त प्रेस विज्ञप्ति जारी गर्ने सहमति भएको थियो । सहमति अनुसार दुई दलले संयुक्त प्रेस विज्ञप्ति समेत जारी गरेका छन् ।

प्रेस विज्ञप्ति मार्फत बुधवार दुई दलका बिचमा भएको सहमतिबारे जानकारी गराइएको छ । दुई दलले जनयुद्ध, संयुक्त जनआन्दोलनबाट प्राप्त उपलब्धिहरूको रक्षा गर्दै विकास, समृद्धि र सामाजिक रूपान्तरणसहित समाजवादको बाटोमा अघि बढ्ने प्रतिबद्धता जाहेर गरेका छन् ।

साथै वर्तमान सरकार प्राप्त उपलब्धिहरूको विरुद्धमा लागिरहेकोले सरकारको यस कदमको प्रतिवाद र भण्डाफोर गरी स्थानीय स्तरमा समेत जनपक्षीय काम, विकास निर्माण, भ्रष्टाचार नियन्त्रण गर्दै सुशासन कायम गर्ने अवधारणाका साथ अघि बढ्ने पनि दुई दलले जारी गरेको संयुक्त प्रेस विज्ञप्तिमा उल्लेख छ । दुवै दलले पालिका उपाध्यक्ष र वडा नम्बर २ को अध्यक्षमा माओवादी केन्द्रका तर्फबाट उठेका उम्मेदवारलाई विजयी गराउन समेत संयुक्त अपिल गरेका छन् । माओवादी केन्द्रका जिल्ला संयोजक कुमारी बराल र नेकपा एसका जिल्ला इन्चार्ज भीउमान घर्तीले संयुक्त रूपमा विज्ञप्ति जारी गर्नुभएको छ ।