रुकुम पूर्वको पुथाउत्तरगंगा गाउँपालिका वडा नम्बर २ का नवनिर्वाचित वडाध्यक्ष जगत घर्तीले वडाको समग्र विकासका लागि काम गर्ने प्रतिबद्धता जनाउनुभएको छ । बुधवार वडाध्यक्षमा निर्विरोध निर्वाचित भएपछि उहाँले भौगोलिक रूपमा विकट वडाको समग्र विकासका लागि काम गर्ने बताउनुभएको हो ।
निर्वाचित भएपछि कखरासँग कुराकानी गर्दै उहाँले सुशासन कायम, विकास निर्माण, सामाजिक न्यायको अनुभूति हुने गरी काम गर्ने बताउनुभयो । शिक्षा, स्वास्थ्यको सुधारका साथै विकट भूगोललाई सुगम बनाउन प्रयास गर्ने र पर्यटन पदमार्गमा ध्यान दिने समेत उहाँको भनाई छ ।
‘२ वर्षका लागि वडाध्यक्ष बनेको छु, यो बिचमा धेरै त के गर्न सकिन्छ होला र, तर वडाको समग्र विकासका लागि काम गर्छु, भौगोलिक रूपमा विकट वडालाई विकासमा जोड्न पहल गर्ने छु’ उहाँले भन्नुभयो । साथै उहाँले पार्टीको नीति, विधि र सिद्धान्तमा रहेर काम गर्ने प्रतिबद्धता जनाउनुभएको छ । वडाध्यक्षमा निर्वाचित गराउने सबैलाई उहाँले धन्यवाद समेत व्यक्त गर्नुभएको छ ।
