पुथाउत्तरगंगा गाउँपालिका उपाध्यक्ष पदकी उम्मेदवार नरपुरा बुढा पुनले पहिलो प्राथमिकता सडक सञ्जाललाई दिने बताउनुभएकाे छ । आफू गाउँपालिका उपाध्यक्षमा निर्वाचित भएमा सडकलाई पहिलो प्राथमिकता दिएर काम गर्ने बताउनुभएको हो ।

१३ नम्बर वडाको पिपलतुङमा आयोजित वडा स्तरीय कोण सभालाई सम्बोधन गर्दै उहाँले सडक नपुगेका वडाहरूलाई सडक सञ्जालमा जोड्ने बताउनुभयो । पालिकाभित्र धेरै वडामा अहिलेसम्म पनि सडक नपुगेका कारण जनताले उत्पादन गरेको कृषि उपजले बजार नपाएको स्मरण गर्दै अब उक्त वडाहरूलाई सडक सञ्जालमा जोड्न आफ्नो भूमिका रहने बताउनुभयो ।

गाउँ गाउँमा सडक पुगेपछि मात्र जनतालाई विकासको भएको अनुभूति हुन्छ उहाँले भन्नुभयो । सडक सँग सँगै स्वास्थ्य शिक्षा खानेपानी विद्युत् जस्ता विकास निर्माणका कामहरू भयो भने जनताले ठुलो क्रान्ति जितेको अनुभूति गर्ने छन् , उहाँले भन्नुभयो ।

स्वर्गीय उपाध्यक्ष भुपेन्द्रा बुढाले सुरू गरेका कामलाई पूर्णता दिने उहाँको भनाई रहेको थियो । यति मात्र नभई महिला, बालबालिका, दलित र ज्येष्ठ नागरिकको पक्षमा काम गर्ने बताउनुभयो । आफू पालिका उपाध्यक्षमा पदमा निर्वाचित भएमा महिलाको लागि सीपमूलक तालिमका कार्यक्रम ल्याउने समेत बताउनुभयो ।

महिलालाई आत्मनिर्भर बनाउन सीप आवश्यक भएकाे हुँदा महिलाहरूको लागि सिलाइ कटाइ, राडीपाखी बुनाई,  मुडा बनाई जस्ता कार्यक्रम पालिका भरमा सञ्चालन गर्ने बताउनुभयो । त्यसको लागि पालिकाबासीले आफूलाई अत्यधिक मतले विजय बनाउनु पर्ने उहाँले बताउनुभयाे । 

जनताले दिएको मतको सदुपयोग गरी राज्यबाट पाएका अधिकार प्रयोग गरेर जनताकाे सेवा गर्ने उहाँले बताउनुभयो ।