आफ्नै बुवाको हत्या गरी फरार रूकुम पश्चिमको आठबिसकाेट नगरपालिका वडा नम्बर १० का वीरबहादुर खत्री पक्राउ परेका छन् । आइतबार साँझ बुवा ५१ वर्षीय खड्कसि‌ं खत्रीमाथि चक्कु प्रहार गरी हत्या गरेका २० वर्षीय वीरबहादुर खत्रीलाई प्रहरीले मङ्गलवार आज बिहान पक्राउ गरेको हो ।

गाउँमै लुकेर बसेको अवस्थामा पक्राउ गरिएको जिल्ला प्रहरी प्रमुख पहरी नायव उपरीक्षक नवराज पोखरेलले जानकारी दिनुभयो । वीरबहादुर घटना घटाएर फरार भएका थिए । घटना लगत्तै घटना स्थलमा पुगेको इलाका प्रहरी कार्यालय राडीले खोजी जारी राखेको थियो । जिल्लाबाट समेत प्रहरी टोली खटिएको थियो ।

घटना घटेको तेस्रो दिनमा प्रहरीले उनलाई पक्राउ गरेको हो । उनको खोजीका लागि प्रहरीले गाउँ तथा जिल्लाका नाकामा कडाइ गरेको थियो । उनलाई पक्राउ गरी जिल्ला प्रहरी कार्यालयको हिरासतमा राखिएको र घटनाको अनुसन्धान भइरहेको प्रहरीले जनाएको छ । वीरबहादुरलाई जिल्ला अदालतमा उपस्थित गराई कर्तव्य ज्यान मुद्दामा अदालतबाट पहिलो पटक ७ दिनको म्याद थप गरिएको जिल्ला प्रहरी कार्यालयका प्रहरी निरीक्षक ऋषि पाठकले जानकारी दिनुभयो ।