जाजरकोटको भेरी नगरपालिका–१०, नुवागाउँस्थित मध्यपहाडी लोकमार्गमा सोमबार राति बोलेरो जिप दुर्घटना हुँदा दुईजनाको मृत्यु भएको छ भने एकजना गम्भीर घाइते भएका छन् । मृत्यु  हुनेमा चालक कैलालीका मनाेज केसी र सहचालक जुम्लाका मिथुन हमाल रहेकाे प्रहरीले जनाएकाे छ ।

दुर्घटनामा गम्भीर घाइते ३ जनालाई उपचारका लागि जिल्ला अस्पताल जाजरकाेट लगिएकामा चालक र सह चालककाे उपचारका क्रममा मृत्यु भएकाे प्रहरीले जनाएकाे छ । दुवैजनाको टाउको, अनुहार, हात, खुट्टा र भित्री अंगहरूमा गम्भीर चोट लागेको थियो।

दाङका कमल चौधरीको दाहिने हात भाँचिएको र शरीरमा अन्य सामान्य चोट रहेकोले थप उपचारका लागि उनलाई काठमाण्डौंस्थित नेशनल ट्रमा सेन्टरमा रिफर गरिएको छ ।

कार्कीगाउँबाट कुदु जाँदै गरेको प्रदेश ३-०१-०२ च ४७१९ नम्बरको बोलेरो जिप राति करिब ८:५५ बजे सडकबाट करिब ७०० मिटर तल खसेको छ । स्थानीयले इलाका प्रहरी कार्यालय, जगतिपुरलाई जानकारी दिएपछि प्रहरी निरीक्षक दलबहादुर विष्टको नेतृत्वमा ४ जनाको टोली घटनास्थलतर्फ खटिएको थियो । 

थप उद्दारका लागि जिल्ला प्रहरी कार्यालय, जाजरकोटबाट प्रहरी निरीक्षक दिनेश तिमिल्सेनाको नेतृत्वमा ११ जनाको टोली परिचालन गरिएको थियो । 

तीव्र गतिका कारण बाेलेराे दुर्घटना भएकाे प्रारम्भिक अनुसन्धानबाट खुलेकाे जाजरकाेट प्रहरी प्रमुख पुरुषोत्तम प्रसाद पाण्डेले जानकारी दिनुभयाे । घटननकाे थप अनुसन्धान चलिरहेकाे उहाँले बताउनुभयाे ।