उद्योग तथा उपभोक्ता हित संरक्षण कार्यालय रुकुम पश्चिमले अचार तथा सिन्की बनाउने तालिम संचालन गर्ने भएको छ । आर्थिक वर्ष २०८१/०८२ को वार्षिक स्वीकृत कार्यक्रम अनुसार सिपसँग सहयोग कार्यक्रम अन्तर्गत अचार तथा सिन्की  बनाउने तालिम संचालन गर्न लागेको हो । १५ दिने अचार तथा सिन्की बनाउने तालिमको लागि १५ दिने सूचना मार्फत सबैलाई जानकारी बनाएको उद्योग तथा उपभोक्ता हित संरक्षण कार्यालयका सूचना अधिकारी शेबहादुर ओलीले जानकारी दिनुभयो ।

उहाँका अनुसार जिल्ला भित्रका इच्छुक नेपाली नागरिकहरुले मंसिरमसान्तसम्म नागरिकताको प्रतिलिपी सहित निवेदन दिन पाउँछन् । प्रत्येक पालिकाबाट २/२ जना गरेर १२ जना प्रशिक्षार्थीहरुलाई तालिम दिइने उहाँले जानकारी दिनुभयो । तालिममा सहभागि हुनको लागि नेपाली नागरिक, सामान्य लेखपढ गर्न सक्ने, १६ वर्ष उमेर पुगि ५० वर्ष ननाघेका,  उद्योग व्यवसाय गर्न इच्छुक व्यक्तिले आवेदन दिन सक्नेछन् । 

तालिममा सहभागि प्रशिक्षार्थीलाई तालिम अवधिभर निशुल्क खाना, खाजा नास्ता र बासको  व्यवस्था छ । भने उद्योग दर्ता गर्दा लाग्ने दस्तुर कार्यालयले भुक्तानि गरिदिने सूचना अधिकारी ‍ओलीले जानकारी दिनुभयो । त्यस्तै तालिम पश्चात प्रत्येक प्रशिक्षार्थिलाई ६० हजार रुपैयाँ बराबरको मेसिनरि औजार, सामग्री तथा कच्चा पदार्थ उपलब्ध गराइने छ ।

 लक्षित वर्गको हकमा लागत सहभागिता ३० प्रतिशत र अन्य वर्गको हकमा लागत सहभागिता ५० प्रतिशत सहभािगले बेहोर्नुपर्ने छ । तालिमको लागि प्रदेश सरकारबाट १५ लाख रुपैयाँ बजेट प्राप्त भएको उद्योग तथा उपभोक्ता हित संरक्षण कार्यालय रुकुम पश्चिमले जनाएको छ ।