रुकुम पश्चिमको बाँफिकोट गाउँपालिका वडा नम्बर २ मा कुनाखेत मेलाको अवसरमा आयोजित खुला पुरुष डबल ब्याडमिन्टन प्रतियोगिता सम्पन्न भएको छ । प्रतियोगितामा मुसिकोटको विशाल विष्ट र नवचन्द्र ओलीको जोडी प्रथम भएको छ । आज भएको फाइनलमा जीवन बोहरा र डिलबहादुर नाथको जोडीलाई २–१ को सेटमा पराजित गर्दै विशाल र नवचन्द्रको जोडी विजेता बनेको हो । उक्त जोडीले नगद २० हजार, कप, मेडल र प्रमाणपत्र प्राप्त गरेको छ ।

उपविजेता जीवन र डिलबहादुरको जोडीले १५ हजार पुरस्कार प्राप्त गरेको आयोजक प्रगतिशील युवा क्लब बाँफिकोट २ ले जनाएको छ । त्यस्तै प्रतियोगितामा खिम खनाल र अनमोल पुन मगर तथा गिर्भान पुन र नरेश चन्दको जोडी सान्त्वना भएको छ । उक्त दुई जोडीले समान ५ हजार नगद पुरस्कार प्राप्त गरेको आयोजकले जनाएको छ । प्रतियोगितामा १८ जोडीले प्रतिस्पर्धा गरेका थिए ।

परम्परागत कुनाखेत मेलाका अवसरमा हरेक वर्ष विभिन्न खेलकुद प्रतियोगिता आयोजना गर्ने गरिएको छ । यो वर्ष पनि मेलाको अवसरमा विभिन्न प्रतियोगिता आयोजना गरिएको छ । यो वर्षको मेला जारी छ ।