रुकुम पश्चिमको बाँफिकाेट गाउँपालिका वडा नम्बर २ कुनाखेत मेलामा एक व्यक्ति मृत फेला परेको घटनामा प्रहरीले ४ जनालाई पक्राउ गरेको छ । परम्परागत कुनाखेत मेला हेर्न गएका रुकुम पूर्वको पुथाउत्तरगंगा गाउँपालिका ५ घर भई हाल रुकुम पश्चिमको मुसिकोट नगरपालिका १ खलङ्गामा बस्दै आएका लीलाबहादुर घर्ती पुस १ गते मेला स्थल नजिकै मृत फेला परेका थिए ।

टाउकोमा गहिरो चोट रहेको र घटना शङ्कास्पद देखिएपछि प्रहरीले हत्याको आशङ्कामा अनुसन्धान गरिरहेको छ । घटनामा शङ्कास्पद ४ जनालाई पक्राउ गरी अनुसन्धान गरिरहेको जिल्ला प्रहरी कार्यालयका सूचना अधिकारी प्रहरी निरीक्षक ऋषि पाठकले जानकारी दिनुभयो ।

उहाँका अनुसार पक्राउ परेकाहरू मेला आसपास क्षेत्रका छन् । ३ जनालाई गाउँबाटै र एक जनालाई बाँकेबाट पक्राउ गरिएको उहाँले बताउनुभयो । पक्राउ परेकाहरूको नाम भने प्रहरीले सार्वजनिक गरेको छैन । अनुसन्धानको क्रममा रहेकोले केन्द्रीय निर्देशन अनुसार आरोपीको नाम सार्वजनिक नगरिएको पाठकले बताउनुभयो ।

अनुसन्धानका क्रममा रहेका आरोपीलाई प्रहरीले यसअघि सार्वजनिक गर्ने गरेकोमा अब भने अनुसन्धानका क्रममा रहेका व्यक्तिलाई सार्वजनिक नगर्नु भनेर निर्देशन आएको उहाँको भनाई छ ।

पक्राउ परेका माथि रुकुम जिल्ला अदालतबाट ७ दिनको म्याद लिएर ज्यान मुद्दामा अनुसन्धान भइरहेको उहाँले बताउनुभयो । घटनाको अनुसन्धानका लागि तालिमप्राप्त कुकुर सहितको टोली घटनास्थल पुगेको थियो । मङ्गलवार केनाइन शाखा प्रहरी प्रदेश कार्यालय सुर्खेतबाट तालिम प्राप्त कुकुर ल्याएर घटनास्थलको अनुसन्धान गरिएको थियो ।