क्रिकेटर युनिशविक्रम सिंहलाई सम्मान गरिएको छ । भर्खरै सम्पन्न नेपाल प्रिमियर लिग एनपिएलमा कर्णाली याक्सका तर्फबाट सहभागी भई गृह जिल्ला पुगेका सिंहलाई जाजरकोट युवा क्रिकेट क्लबले मङ्गलवार सदरमुकाम खलङ्गामा सम्मान गरेको हो ।

एनपिएलमा उत्कृष्ट प्रदर्शन गरी जाजरकोट तथा कर्णालीको नाम उँचो राख्ने क्रिकेटर सिंहलाई दोसल्ला ओढाएर सम्मान गरिएको जाजरकोट युवा क्रिकेट क्लबका अध्यक्ष अनिश कार्कीले जानकारी दिए । एनपिएल अक्सनमा सी क्याटागाेरीमा रहेका युनिशलाई २ लाखमा कर्णाली याक्समा अनुबन्ध गरेकाे थियाे ।

उनले कर्णाली प्रदेशबाट विभिन्न राष्ट्रिय प्रतियोगिता तथा नेपालकाे तर्फबाट अन्तर्राष्ट्रिय प्रतियोगितामा समेत सहभागिता जनाइसकेका छन् । उनले नेपालको तर्फबाट १९ वर्ष मुनिको एसिया कप समेत खेलिसकेका छन् । भर्खरै युएईमा सम्पन्न यु-१९ एसिया कपमा उनले नेपाली टिमबाट खेलेका थिए । १८ वर्षे युनिश राइट आर्म अफब्रेक बलर हुन ।