तारा एयरले रुकुम पश्चिममा पुनः उडान भर्ने भएको छ । केही वर्ष अघि सञ्चालन भई रोकिएकामा पुनः उडान भर्न लागेको हो । अब तारा एयरले हप्तामा दुई दिन नेपालगन्ज–रुकुम पश्चिम उडान भर्ने छ । सोमबार र शुक्रवार उडान हुने तारा एयरका रुकुम पश्चिम प्रतिनिधि गणेश बोहराले जानकारी दिनुभयो ।

जिल्लावासीको सहजताका लागि तारा एयरको उडान सुरु गर्न लागेको उहाँले बताउनुभयो । अहिले तत्काललाई नेपालगन्ज–रुकुम पश्चिम उडान सुरु गरिएकामा काठमाडौँसम्म पनि गर्न सेवा विस्तारको लागि पहल गर्ने उहाँले बताउनुभयो । हाल नेपाल एयरलाइन्सले मात्र जिल्लामा हप्तामा दुई दिन सेवा दिँदै आएको छ ।

आइतबार काठमाडौँ–रुकुम पश्चिम–नेपालगन्ज उडान भर्ने नेपाल एयरलाइन्सको विमानले मंगलबार नेपालगन्ज–रुकुम पश्चिम–काठमाडौँ उडान भर्ने गरेको छ । एउटा मात्र एयरलाइन्सले उडान भर्ने भएकोले यात्रुहरूले भनेको बेला टिकट नपाउने समस्या रहेको छ । त्यस्तै चाहेको समयमा यात्रा गर्न नपाउने समस्या पनि रहेको छ ।

अब हप्तामा दुई दिन तारा एयरलाइन्सको उडान थपिने भएपछि जिल्लावासीलाई सहज हुने भएको छ ।