कास्कीको पोखराबाट रुकुमकोट आउँदै गरेको जिप दुर्घटना हुँदा चार जना घाइते भएका छन् । रुकुम पूर्वको सिस्ने गाउँपालिका वडा नम्बर ५ को धारापानीमा बिहीबार बिहान साढे ३ बजेतिर भएको जिप दुर्घटनामा चार जना घाइते भएको जिल्ला प्रहरी कार्यालय रुकुम पूर्वले जनाएको छ ।

कार्यालयका अनुसार ग १ ज ७१०८ नम्बरको जिप दुर्घटना हुँदा घाइते हुनेमा रुकुम पूर्वको पुथाउत्तरगंगा गाउँपालिका वडा नम्बर ५ का २२ वर्षीय प्रेम कामी, सोही वडाका २१ वर्षीय जेनिस श्रीपाली, बारा जिल्लाका १८ वर्षीय सर्पराज देवा र बाराकै १८ वर्षीय चन्द्रकुमार देवा रहेका छन् ।

घाइते सबैको अवस्था सामान्य रहेको र रुकुमकोट जिल्ला अस्पतालमा उपचार भइरहेको प्रहरीले जनाएको छ । जिप मध्यपहाडी लोकमार्गबाट तल खसेको छ ।