रूकुम पश्चिमकाे आठबिसकाेट नगरपालिकामा काठे पुलबाट खसेर एक व्यक्तिकाे मृत्यु भएकाे छ । वडा नम्बर १२ तार्सिबाङका ५५ वर्षीय खलबहादुर बुढाकाे मृत्यु भएकाे हाे । बुढाकाे बिहिबार दिउँसाे वडा नम्बर १२ कै कालाखाेलामा रहेकाे काठेपुलबाट खसेर मृत्यु भएकाे वडा नम्बर १२ का वडाध्यक्ष खम्मे कुसारीले जानकारी दिनुभयाे ।

उहाँका अनुसार स्यानीबार्खु गाउँबाट घर फर्किदै गर्दा कालाखोलामा रहेको काठकाे अस्थायी पुलबाट खाेलामा खसेकाे र मृत्यु भएकाे हाे । यद्यपि खाेला भने बगाउने खालकाे ठुलाे छैन । स्थानीय एक शिक्षिकाले बुढालाई खाेलामा मृत अवस्थामा देखेपछि आफूलाई खबर गरेकाे र त्यसपछि वडा सदस्यलाई घटनास्थलमा पठाएकाे उहाँले बताउनुभयाे ।

जिल्ला प्रहरी कार्यालय रूकुम पश्चिमका सूचना अधिकारी प्रहरी निरीक्षक ऋषि पाठकले पनि बाख्रा लिएर घर जाँदै गरेका बुढाकाे काठे पुलबाट चिप्लिएर खाेलामा खस्दा मृत्यु भएको जानकारी आएकाे बताउनुभयाे । याे खाेलामा पुल नहुँदा त्यसक्षेत्रका स्थानीयलाई सास्ती छ ।

विशेषगरी वर्खायाममा विद्यार्थी तथा स्थानीयलाई आवतजावत गर्न निकै समस्या हुने गरेकाे वडाध्यक्ष कुसारीले बताउनुभयाे । पुलका लागि पहल गर्दा पनि कुनै निकायले वास्ता नगरेको उहाँले बताउनुभयो ।