रुकुम पश्चिमको बाँफिकोट गाउँपालिका वडा नम्बर २ ले खेलाडीहरूलाई सम्मान गरेको छ । वडाले जिल्ला सदरमुकाम खलङ्गामा केही समय अघि सञ्चालन भएको जनक–सुधन स्मृति कप रनिङ शिल्ड भलिबल र बाँफिकोट गाउँपालिका ३ मा आयोजित १४ औँ स्यार्पू महोत्सवमा भएको खेलकुदमा विभिन्न स्थान हासिल गर्ने वडा नम्बर २ सहित अन्य वडाका खेलाडीहरूलाई सम्मान गरेको हो । 

वडा नम्बर २ का महिला पुरुष खेलाडी, वडा नम्बर ३ का पुरुष खेलाडी र वडा नम्बर ४ का महिला पुरुष खेलाडीलाई सम्मान गरिएको वडाध्यक्ष प्रकाश खत्रीले जानकारी दिनुभयो । प्रत्यक खेलाडीलाई सम्मान पत्रले सम्मान गरिएको हो भने एक टिमलाई एक वटाका दरले ५ वटा महिला पुरुष भलिबल टिमलाई भलिबल उपहार समेत दिइएको उहाँले बताउनुभयो । यसले थोरै भए पनि खेलाडीहरूको मनोबल उच्च हुनेमा वडा सरकार विश्वस्त रहेको वडाध्यक्ष खत्रीको भनाई छ ।

आगामी दिनहरूमा समेत खेलाडीहरूको मनोबल उच्च गराउने गरी वडाले सोचिरहेको उहाँले बताउनुभयो । खेलाडीहरूलाई कुनै पनि निकायले वास्ता नगरिरहेको अवस्थामा वडाले केही प्रयास गरेको अध्यक्ष खत्रीले बताउनुभयो । सरकारले लगानी नगरेसम्म खेलकुदको विकास सम्भव नभएको समेत उहाँले बताउनुभयो ।