रुकुम पश्चिम र जाजरकोटमा गत वर्षको कार्तिक १७ गते गएको भूकम्पले पुर्‍याएको पुनर्निर्माण अझै सुरु हुन सकेको छैन । भूकम्प प्रभावितहरू अहिले पनि टहराको बासमा छन् । सरकारका कारण पुनर्निर्माणमा ढिलाइ भइरहेको छ । कतिपय भूकम्प प्रभावितले त अझै पनि अस्थायी आवासकै लागि पहिलो किस्ता पाउन नसकिरहेको अवस्थामा दोस्रो किस्ता समेत पूर्ण छैन । भूकम्प प्रभावितहरू पुनर्निर्माणको पर्खाइमा रहेका छन् । 

यद्यपि विभिन्न सङ्घ संस्थाहरूको सहयोगमा नमुना घर निर्माण लगायतका काम भइरहेका छन् । ९ महिना देखि सञ्चालनमा रहेको संयुक्त पुनर्लाभ परियोजना अन्तर्गत नमुना घर निर्माण सहित विभिन्न गतिविधिहरू भएका छन् । बेलायत सरकारको सहयोगमा आइओएम सहितका ५ वटा संयुक्त राष्ट्र सङ्घीय निकाय तथा तिनका साझेदार संस्थाहरू मार्फत सञ्चालित संयुक्त पुनर्लाभ परियोजना अन्तर्गत २६ वटा घरहरू निर्माण गरिएको छ । रुकुम पश्चिममा १४ र जाजरकोटमा १२ वटा घरहरू निर्माण गरिएको हो । 

यो पनि पढ्नुहोस

संयुक्त पुनर्लाभ परियाेजना सकियाे, रुकुम पश्चिम र जाजरकोटमा २६ नमुना घर निर्माण 

यो परियोजना अन्तर्गत घर निर्माण बाहेक डकर्मी तालिम, यौन शोषण तथा दुर्व्यवहार विरुद्धको सडक नाटक प्रदर्शन, स्थानीय तहका प्राविधिकका लागि भवन संहिता, सुरक्षित आवास सम्बन्धी तालिम प्रदान, मोबाइल भ्यान तथा रेडियो र टेलिभिजनबाट सचेतना फैलाउने, स्थानीय तहलाई विपत् व्यवस्थापन सम्बन्धी नीति निर्माणमा सहयोग लगायतका काम समेत भएका बताइएको छ ।

९ महिने यो परियोजना यही जनवरी अन्तिमबाट सकिने छ । परियोजना मार्फत भएका गतिविधि तथा सिकाइबारे जानकारी गराउन रुकुम पश्चिमको मुसिकोट खलङ्गामा आइओएमले जिल्ला स्तरीय सिकाई कार्यशाला आयोजना गरियो । उक्त कार्यक्रमको अवसरमा परियोजना अन्तर्गत भएका गतिविधि झल्किने फोटो प्रदर्शन समेत गरिएको थियो । संयुक्त पुनर्लाभ परियोजना अन्तर्गत भएका काम फोटोमा हेर्नुहोस् ।