सहिद दिवसको अवसरमा रुकुम पश्चिमको चौरजहारीमा विभिन्न कार्यक्रमहरू हुने भएका छन् । दिवसको अवसरमा स्वतन्त्र विद्यार्थी युनियन स्ववियु शीतल क्याम्पस चौरजहारीले विभिन्न प्रतिस्पर्धात्मक कार्यक्रमहरू आयोजना गरेको छ । स्ववियुले खुला विद्यालय स्तरीय हाजिर जवाफ र खुला क्याम्पस स्तरीय ब्याडमिन्टन प्रतियोगिता आयोजना गरेको हो । 

खुला विद्यालय स्तरीय हाजिर जवाफ प्रतियोगिताको प्रथमले १० हजार, द्वितीयले ७ हजार र तृतीय हुनेले ४ हजार नगद तथा प्रमाणपत्र प्राप्त गर्ने स्ववियु सभापति नीराजन केसीले जानकारी दिनुभयो । त्यस्तै खुला क्याम्पस स्तरीय ब्याडमिन्टनमा प्रथम हुनेले १० हजार, द्वितीयले ७ हजार र तृतीयले ४ हजार नगद, मेडल र प्रमाण पत्र प्राप्त गर्ने उहाँले बताउनुभयो ।

ब्याडमिन्टनमा जुनसुकै क्याम्पसका शिक्षक, विद्यार्थी तथा कर्मचारी सहभागी हुन सकिने तर जोडी आफ्नै क्याम्पसको हुनुपर्ने आयोजकले जनाएको छ । कार्यक्रम माघ १६ गते हुने छ ।