प्रेस सेन्टर नेपाल जिल्ला समन्वय समिति रुकुम पश्चिमले विभिन्न कार्यक्रम गरी २१ औँ स्थापना दिवस मनाएको छ । दिवसको अवसरमा जिल्लामा प्रभातफेरी र रक्तदान कार्यक्रम भएको छ । बिहान मुसिकोटमा प्रभातफेरी गरिएको थियो । 

मुसिकोट खलङ्गाको कालिकास्थानबाट सुरु भएको प्रभातफेरी कार्यक्रम खलङ्गाको तल्लो बजार, जिप्रका, प्रशासन हुँदै पुनः कालिकास्थानमा पुगेर कोणसभामा परिणत भएको थियो । 

कार्यक्रममा बोल्दै जिल्ला समन्वय समिति प्रमुख लुम्बिनी गौतमले पत्रकारहरूले आफ्नो कर्मठ कार्यलाई निरन्तरता दिनुपर्ने बताउनुभयो । शुभकामना व्यक्त गर्दै उहाँले पत्रकार सधैँ उपेक्षामा रहेका वर्गका पक्षमा रहनुपर्ने बताउनुभयो । 

नेकपा माओवादी केन्द्रका जिल्ला इन्चार्ज वसन्त शर्माले पत्रकारितामा लगनशीलताका साथ अघि बढ्न पत्रकारहरूलाई आग्रह गर्नुभयो । नेपाल पत्रकार महासंघका उपाध्यक्ष सुमित्रा केसीले महासंघ पत्रकारहरूको हक हितका लागि प्रतिबद्ध रहेको बताउनुभयो ।

कार्यक्रममा जिल्ला समन्वय समिति प्रमुख लुम्बिनी गौतम, नेकपा माओवादी केन्द्रका जिल्ला इन्चार्ज वसन्त शर्मा, जिल्ला संयोजक गोविन्द रोका सचिन, पत्रकार महासंघका जिल्ला उपाध्यक्ष सुमित्रा केसी, उद्योग वाणिज्य संघका अध्यक्ष पलबहादुर खड्का, गैर सरकारी संस्था महासंघका अध्यक्ष भिमराज ओली, पत्रकारका विभिन्न संघ संगठनका प्रमुख तथा प्रतिनिधि, अन्य पत्रकार सहित सरोकारवालाहरूको सहभागिता रहेको थियो । 

कार्यक्रमको सञ्चालन  प्रेस सेन्टर नेपाल रुकुम पश्चिमका जिल्ला अध्यक्ष मनिष खड्काले गर्नुभएको थियो ।