रुकुम पश्चिमको मुसिकोट नगरपालिका वडा नबर ७ साँखमा जारी प्रथम पापिनी मेला कप भलिबल आज सकिँदै छ । आज फाइनल खेल हुन लागेको आयोजक हाम्रो सरोकार साँखले जनाएको छ । उपाधिका लागि बाँफिकोट गाउँपालिका वडा नम्बर ३ र ४ ले प्रतिस्पर्धा गर्ने हाम्रो सरोकारका अध्यक्ष रिजन पाण्डेले जानकारी दिनुभयो । 

हिजो भएको सेमिफाइनलमा बाँफिकोट ३ सानीभेरी ४ र बाँफिकोट ४ आयोजक हाम्रो सरोकारलाई पराजित गर्दै फाइनल पुगेका हुन् । त्यस्तै प्रतियोगितामा सानीभेरी ४ तृतीय भएको छ । हिजै तेस्रो स्थानका लागि भएको प्रतिस्पर्धामा कडा प्रतिस्पर्धाका बिच आयाेजक हाम्राे सराेकारलाई ३–२ को सेटमा पराजित गर्दै सानीभेरी ४ तृतीय भएको हो । 

प्रतियोगितामा विभिन्न ठाउँका २० टोलीले भाग लिएका थिए । खेल शुद्ध वडा स्तरीय हो । महिला तर्फ भने रुकुम भलिबल टिम प्रथम भएको छ । रुकुम पूर्वको सिस्ने गाउँपालिका वडा नम्बर ७ लाई पराजित गर्दै बाँफिकोट २ को रुकुम भलिबल टिम प्रथम भएको हो । 

पुरुष भलिबल तर्फ विजेता टिमले १ लाख १ हजार नगद, कप, मेडल र प्रमाण पत्र पाउँदा उपविजेता हुने टिमले ७१ हजार नगद, मेडल र प्रमाण पत्र प्राप्त गर्ने आयोजक हाम्रो सरोकारका महासचिव प्रकाश विकको भनाई छ । तृतीय हुने टिमले भने नगद ४१ हजार, मेडल र प्रमाण पत्र पाउने छ । 

महिला तर्फको विजेताले १५ हजार नगद, कप, मेडल र प्रमाणपत्र प्राप्त गर्दा उपविजेताले १० हजार तथा तृतीय हुने टिमले ५ हजार नगद, मेडल र प्रमाण पत्र प्राप्त गर्ने महासचिव विकले जानकारी दिनुभयो ।