रुकुम पश्चिममा थप ५० वटा अक्सिजन सिलिण्डर आईपुगेका छन् । पूर्व मन्त्री तथा रुकुम पश्चिमबाट प्रतिनिधि सभा सदस्य जनार्दन शर्मा ‘प्रभाकर’ले थप ५० वटा सिलिण्डर जिल्ला पठाउनुभएको हो । शर्माले आफ्नै पहलमा व्यवस्थापन गरेर ५० लिटरका ५० वटा सिलिण्डर जिल्लाको चौरजहारीमा पठाउनुभएको छ । उक्त सिलिण्डर आज बिहान चौरजहारी पुगेको चौरजहारी नगरपालिकाका प्रमुख विशाल शर्माले जानकारी दिनुभयो । थप अक्सिजन सिलिण्डर आएपछि अहिले तत्काललाई चौरजहारीमा अक्सिजन अभाव नरहेको उहाँले बताउनुभयो । 

जिल्लामा अक्सिजनको अभाव हुन नदिनका लागि थप सिलिण्डर व्यवस्थापन गरेर जिल्ला पठाईएको नेता शर्माका स्वकीय सचिव श्रीकुमार कठायतले जानकारी दिनुभयो । सिलिण्डरको व्यवस्थापन गरेर भैरहवाबाट रिफल गरेर पठाईएको उहाँले बताउनुभयो । ‘जिल्लामा अक्सिजनको अभाव हुन नदिनका लागि उहाँ लागिरहनुभएको छ, कठायतले भन्नुभयो, चौरजहारी अस्पताल कर्णाली प्रदेशले तोकेको कोभिड विशेष अस्पताल रहेको र त्यहाँ बिरामीको चाप बढि हुनसक्ने अवस्थालाई मध्यनजर गरेर चौरजहारीमा थप ५० सिलिण्डर अक्सिजन पठाईएको हो ।’ यसअघि पनि नेता शर्मा आफै चौरजहारी अस्पतालमा ५० वटा अक्सिजन सिलिण्डर लिएर पुग्नु भएको थियो । 

त्यस्तै उहाँले नै जिल्ला अस्पताल सल्लेमा समेत २९ वटा अक्सिजन सिलिण्डर पठाउनुभएको थियो । नेता शर्माले आफ्नै पहलमा चीनबाट थप सिलिण्डर मगाएको र ति सिलिण्डर आएपछि जिल्ला पठाईने स्वकीय सचिव कठायतले बताउनुभयो । यो संगै नेता शर्माले अहिलेसम्म जिल्लामा १ सय २९ वटा अक्सिजन सिलिण्डर पठाउनुभएको छ ।  

चौरजहारीमा भर्न मिल्ने अक्सिजन प्लान्ट बन्दै 
चौरजहारीमा अक्सिजन प्लान्ट पनि निर्माण हुँदै छ । खाली सिलिण्डर भर्न मिल्ने प्लान्ट निर्माण हुन लागेको हो । नेता शर्माकै पहलमा चौरजहारी अस्पताल भित्रै प्लान्ट निर्माण हुदै छ । प्लान्टका लागि मेशिन र आवश्यक विभिन्न सामग्री अर्डर गरिएको र एक सातामा सामान आईपुग्ने चौरजहारी नगरपालिकाका प्रमुख शर्माले बताउनुभयो । अहिले अक्सिजनको माग सिलिण्डरले धानिरहेको र प्लान्ट निर्माण भएमा जिल्ला भरमा नै अक्सिजन आपुर्ति सहज हुने विश्वास गरिएको छ ।